San Pra ai Romuald a Poi Nhtoi (June 19) 19 June 2023

San Pra ai Romuald a Poi Nhtoi (June 19)

San Pra ai Romuald gaw, Camaldolese Tawra Jau Magam Gun Wuhpung hpe gaw de hpang dat ai San Pra ai Masha rai nga ai. Shi gaw, lai wa sai A.D (951) ning hta, Italy Mungdan, Ravenna Mare na, Lusu nga pyaw ai kanu yan kawa kaw na shangai chyinghkai wa ai rai nga ai. Shi gaw, Shi a Brang Ram Prat tup hta, mungkan a pyaw hpa lam hta len hkawm nna nga lai wa sai. Lani mi na aten hta, Shi a Kawa gaw, Lamu ga htingra hte seng nna, Shi a jinghku langai mi hpe sat kau ai hpe mu hkrup ai majaw, grai kajawng mat ai hpang San Pra ai Apollinare Tawra Jau jawng de sa hprawng shing byi nga mat wu ai. Dai Jawng kaw akyu hpyi ai hte ru yak jam jau hkam sharang nna tara shadik let nga mat ai. Dai hpe mu chye ya ai, Shi a Kawa mung shi a mara a matu, myit malai lu nna shi a ngam nga ai asak hkrung lam hpe San Severo Mare na Tawra Jau Jawng kaw tara sa shadik let nga mat nu ai. Kade nna yang, Romuald gaw, mara tam nna jahpoi asawng hkrum ai sha n-ga, dai jawng kaw nna shabai kau ai hpe hkrum nu ai.

San Pra ai Romuald gaw, shaning (30) ning tup shara shagu du hkawm nna simsa ai shara tam let, Tawra Jau Jawng ni hkan hpaw da ya lai wa sai rai nga ai. Arezzo mare makau na, Camaldoli shara kaw (1012) ning hta shi hpaw hpang da ai jawng gaw, mying kaba dik ai Jawng tai wa sai. Dai Jawng kaw shi gaw, Camadolise Tawra Jau Wuhpung hpe hpaw hpang da sai rai nga ai.

Dai Tawra Jawng kaw na Lusu ai shabrang kasha langai mi gaw, Jau Romuald hpe mara tam ai; dai hpe kaga Tawra Jau ni kam ai majaw, Jau Kaba Romuald hpe shanhte a Wuhpung kaw nna shaprau kau ma ai. Jau Romuald chyawm gaw, dai n teng n man mara shagun ai hpe asim sha shata (6) tup hkam sharang let nga lai wa ai. Dai hpang, dai mara tam ai lam tsep kawp n jaw ai hpe mu chye wa ai shaloi kaga Tawra Jau ni gaw, Jau Romuald hpe lit bai shatsam ya ma ai.

San Pra ai Romuald gaw, 1027 ning, June shata (19) ya shani hta, Ancona Mare makau na, Castro Tawra Jau Jawng hta e, Madu kaw yup pyaw ban sa mat wa sai rai nga ai.

Shi n nga mat ai hpang, Nawku Kawn, Shi hpe San Pra ai Masha dang dat let, Shi a Poi Nhtoi hpe mung, June shata (19) ya shani ngu masat shagrau dat ya sai rai nga ai.

Daini Nawku Hpung gaw, San Pra ai Romuald a Poi Nhtoi hpe galaw nga ga ai aten hta, anhte a Prat hta Mung, tengman ai lam hta hkawm sa ai, mai kaja ai lam hpe galaw nga ga ai raitim, kalang lang tinang a manaw manang ni kawn mara tam ai lam ni hte hkrum kadup wa chye nga ai, raitimung, Jau Romuald zawn hkam sharang let, teng man ai mahtai hpe sak se hkam lu ai ni byin tai lu hkra shakut sa wa nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)