San Pra ai Romaric a Poi Nhtoi (December 10) 10 December 2022

San Pra ai Romaric a Poi Nhtoi (December 10)

San Pra ai Romaric gaw, Lusu ai, Fransik Hkawhkam Clotaire (II) a hkaw kaw na magam gun masha kaba langai mi rai nna, tsa ban (7) hta sak hkrung lai wa sai rai nga ai.

San Pra ai Romaric hpe Nawku Hpung de woi jashawn la ai gaw, San Pra ai Amatus rai nga ai. Shi gaw, Hkristan hpung de shang wa ai hpang, shi a mayam ni hpe shalawt kau nhtawm, Luxeuil shara kaw na Tawra Jau Jawng de shang mat wa nu ai.

A.D (620) Ning hta, Shi a Kanu Kawa ni kaw nna lu la da ai Lamu ga kumhtaw kaw e, Remiremont Jau Jawnwg hpe gaw gap da ya sai. Dai Remiremont a lachyum gaw, “Romaric a Kawng” ngu ai rai nga ai. Shi hpe Hkristan shatai ya ai San Pra ai Amatus gaw, dai jawng kaw na Jau Kaba shawng tai wa sai rai nga ai.

Jau Kaba Amatus n nga mat ai shaloi shi a hkang kaw Jau Romaric bai galai gun hpai sai rai nga ai. Jau jawng dai gaw, mying kaja pru nna, Jau tai jawng de shang wa ai ni grai law htam wa ma ai. Shi gaw, masha ni hpe galaw daw ai myit jasat grai kaba ai wa rai nga ai. Masha ni mung, shi hpe grai hkungga let madat mara ya ma ai.

Dai lam grai dan dawng shangun ai mabyin ni kaw na langai mi gaw, A.D (653) ning hta, Shi si na shawng (3) ya ngu na nhtoi e, Jau Romaric gaw, Hkawhkam kasha Dagobert hpe rawt malan ai ni nga ai grai tsan ai Metz ngu shamying ai shara de sa nhtawm, hkawhkam kasha a malai sa hpyi nem wu ai. Rawt malan ni gaw, Jau Romaric a ga hpe madat ya ma ai sha n-ga, shi hpe Jau Jawng kaw du hkra bai wa sa kau da ma ai.

Jau Romaric gaw, dai mabyin ai hpang (3) ya na ai hpang, Madu kaw yup pyaw ban sa mat wa sai rai nga ai.

Jau Romaric n nga mat ai hpang, 1049 ning, December shata praw (3) ya shani hta, dai aten na Wa Sarabyin Leo (9) gaw, Shi hpe San Pra ai Masha dang dat let, Shi a Poi Nhtoi hpe mung, December shata (10) ya shani masat shagrau dat ya sai rai nga ai.

Daini Nawku Hpung gaw, San Pra ai Romaric a Poi Nhtoi hpe galaw nga ga ai aten hta, anhte a prat hta mung, tinang a dum nta masha ni hte makin jinghku, manaw manang ni hpe, San Pra ai Wa Jau Romaric zawn daw jau chye ai ni, byin tai nga ga law.

By;

Sister Rose Angeline Maran Nang Doi (SFX)

RVA-Kachin Service

#RVA_Kachin_Service

#Feastday_December10

#St_Romaric