San Pra ai Romanus a Poi Nhtoi (August 9) 09 August 2022

San Pra ai Romanus a Poi Nhtoi (August 9)

San Pra ai Romanus hpe gara makam masham hpung kaw na re ai, kaning rai makam masham a majaw si hkam ai lam tsa ban (12) kaw she chye lu nga ai. Roma mare na, gumhpraw jum lit hkam rai nga ai San Pra ai Deacon Lawrence gaw, Nawku Hpung a gumhpraw, hkahkam hpe n jaw ai majaw, htawng sharawng hkrum ai aten hta Romanus gaw, Roma mare na hpyen la langai mi rai nga ai. Hkawhkam wa e zingri shatsang ai raitim, San Pra ai Lawrence a hkam sharang ai myit hpe mu nna grai yu mau let, shi mung, Hkristan hpung shang tai mayu wa nu ai.

Romanus hkum nan hpung shang na matu hpyi shawn la ai majaw, San Pra ai Lawrence gaw, shi hpe htawng kata kaw Kashin Kamun jaw ya sai. Share Shagan Romanus gaw, shi a manang hpyen la ni a man kaw shi Hkristan Hpung de shang mat sai, nga nna n hkrit n tsang ai sha tsun dan wu ai. Dai majaw, shi hpe mung mara shagun let rim la nna, San Pra ai Lawrence hpe sat shamyit kau na shawng shani, A.D (258) ning, August shata (9) ya shani hta, baw kahtam daw sat kau hkrum lai wa nna, shi gaw, Makam Masham a majaw, sat kau hkrum ai Share Shagan langai tai wa nu ai. Makam masham myit kaba rawng jang, zingri zingrat ai lam shagu hpe awng dang kau lu ai lam hpe mung, San Pra ai Romanus hkum nan kasi kamang tai ya lai wa sai.

San Pra ai Romanus n nga mat ai hpang, Nawku Hpung gaw, Shi hpe, San Pra ai Masha hku nna dang dat let, Shi a Poi Nhtoi hpe mung, August shata (9) shani masat shagrau dat ya sai rai nga ai.

Daini Nawku Hpung gaw, San Pra ai Romanus a Poi Nhtoi hpe galaw nga ai aten hta, anhte mung, tinang lu da sai Makam Masham hpe hkungga tsawra manu shadan let, yawng a matu nhtoi tai, jum zawn jashum ya lu ai ni byin tai lu hkra shakut sa wa nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)