San Pra ai Robert Bellarmine a Poi Nhtoi (September 17)

San Pra ai Robert Bellarmine gaw, “Nawku Hpung a Hkansa Tara hte seng ai Canonists, ni kam shamyet ai sanpra ai masha” rai nga ai. Italy Mungdan, Mont Pulciano mare kaw lai wa sai 1542 ning, October praw (4) ya shani hta shangai chyinghkai wa ai rai nga ai. Shi a asak (18) ning du ai shaloi, shi a kawa myit n hkrum ai sha Roma mare na Jesuit Jau Wuhpung de shang mat wa ai.

Jau tai wa ai hpang shi hpe Belgium Mungdan na, Louvain Dakkasu de sa dat ma ai. Protestant Dakkasu Sara kaba ni hte tsun jahta hkat na matu rai nga ai. Sanit ning na ai hpang, shi a makam masham kaba ai myit jasat hte hpaji machye machyang lam ni hta ningtawn ai majaw, Roma Kahtawlik kaw Theology (Karai Kasang Hpaji) hpe sharin sara lit shatsam ya hkrum sai.

Kahtawlik makam masham hpe makawp maga ai lam hte seng nna, Nawku Hpung ka shapraw tawn ai laika ni hta shi ka lajang tawn ai, Disputations on the Controversies, “Shai hkat ai ai lam ni hte seng ai tsun jahta hkat ai lam ni” mying ai laika buk gaw manu dan htum rai nga ai. Ndai Laika buk gaw, Chyum Laika hte seng ai nna mung, sung sung chye ai hpaji hkum tsup nga ai majaw, Protestant ni law law gaw, masha langai hkrai sha ka shalat tawn ai n nrai n hten, nga nna nkam ma ai. Dai laika buk gaw, dut rai manu mat ai hte htangdip gawng na masha langai gaw: Laika ka sara ni yawng ka da ai laika ni gumhpawn nna dut lu ai hta, ndai Jesuit Jau ka ai laika kaw na, ngai gumhpraw grau lu la ai.” nga nna tsun lai wa sai.

San Pra ai Saradaw Robert Bellamine gaw, tara laika buk mung ka kau da ai. Dai Laika buk mung, Chyum Laika hte Immitation of Christ Laika buk yan hta lai nna, ga hpan law law de gale lang htum “Tara sharin laika” Catechism rai nga ai. Shi gaw, 1598 ning hta, Saradaw Kaba “Cardinal” lit shatsam hkrum ai hpang, Trent Zuphpawng kaw dawdan tawn ai lam ni hpe hkan shatup ai; Vulgate ngu ai “Chyum Laika hte seng ai laika buk” hpe mung bai dip shapraw ya ai.

Saradaw Kaba Robert Bellarmine gaw, Vatican hkaw kata na shi a laksan gawk ni kaw nga timung, Hkaulan shadung muk hte shakau hpraw sha sha ai. Shi a gawk kaw grang ai sumpan hpe mung, matsan masha ni hpe buhpun galaw nna jahpun ya kau ai. Mali ning na ai shaloi, shi hpe Capua ginwang na Saradaw lit shatsam ya ma ai. Hpaji ninghkring rai nga timung, Sasana magam gun mahkrum madup n nga ai majaw, shi a manu dan la ai Laika buk ni hpe rap di tawn kau nhtawm, Sasana magam gun wa-ngan zawn hpung masha ni a matu shakut galaw hpang wa nu ai. Sarabyin Pawlu (V) gaw, shi hpe Roma mare de bai shaga la nna, “Vatican Laika Hti Gawknu” Vatican Library hta, ningbaw amu madu lit shatsam ya nna, Sarabyin gaw, ahkyak ai lam shagu hta shi kaw na hpaji hpyi la la rai nga ai.

Saradaw kaba Bellarmine gaw, 1620 ning, September shata (17) ya shani,mJesuit wuhpung shang masha ni hpe shalat shapan St. Andrew jawng kaw, Madu hta yup pyaw ban sa mat wa sai rai nga ai.

1931 ning hta, shi hpe e, Wa Sarabyin Pius (XI) kawn, San Pra ai masha dang dat sai rai nna, shi a poi htoi hpe September (17) ngu masat shagrin dat ya sai rai nga ai.

Daini, Nawku hpung kawn, San Pra ai Saradaw Kaba Robert Bellarmine a Poi nhtoi hpe myit dum galaw nga ai aten hta, anhte hpung masha ni hku nna mung, ra kadawn nga ai, anhte a makau grup yin na masha ni hpe shawang tsawra myit majing hte tinang hta nga ai atsam rau dang lu ai made garum shingtau lu na atsam hpe jaw ya rit ga matu, akyu hpyi la nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)