San Pra ai Robert ( 07 June 2021 )

- San Pra ai Robert gaw, England Mugndan, Gargrave mare kaw shangai chyinghkai wa nna, Northumberland Ginwang, Newminster Tawra Jau jawng hpe gaw de hpang ai Jau kaba langai mi rai nga ai.

- Tsa ban (12) grup yin e, Paris mare na Dakkasu kaw hpaji sharin hkam la lai wa sai rai nga ai. Shi gaw, Gargrave mare na ginwang up Jau tai wa ai; Whitby ginwang na Benedictine Order shang hte Fountains ginwang na Cistercian Wunhpang hta mung lit magam gun hpai lai wa sai rai nga ai.

- Tawra Jau jawng ni law law gap ya ai; shi a mai kaja ai myit jasat hte tara shaku tai lam gaw, kasi kamang kaja tai wa sai. Ramma ni law law shi a kasi hpe mu la nna she de da ai Magam Gun Wuhpung Shang masha ni tai wa masai.

- San Pra ai Jau Robert gaw, n kaja ai nat ni zingri hkrum ai masha ni hpe shamai shatsai ya ai shaman chyeju mung lu ai. Shi a Sumla ni hta e, Shi a lata hta Wuhpung Jum sharawn tawn nhtawm, nat ni hpe si mani wa na matu daru sharin shaga taw nga ai hpe mu lu nga ga ai re.

- Shi gaw, 1159 ning, June shata (7) ya shani hta e, shi a manang Finchale mare na Godric a makau kaw, Madu hta yup pyaw ban sa mat wa sai rai nga ai. Godric gaw, “San Pra ai Robert a wenyi sumsing lamu de wan gumdin zawn lung wa ai hpe nga mu lu ai.” nga nna sakse hkam da nga ai.

- San Pra ai Jau Robert n nga mat ai hpang, Nawku Hpung gaw, Shi hpe San Pra ai Masha dang dat let, Shi a Poi Nhtoi hpe mung, June shata (7) ya shani ngu masat shagrau dat ya sai rai nga ai.

By; Sister Rose Angeline Maran Nang Doi (SFX)

RVA-Kachin Service (Myitkyina)