San Pra ai Regina a Poi Nhtoi (September 7) 07 Sept 2023

San Pra ai Regina a Poi Nhtoi (September 7)

San Pra ai Regina gaw, tsa ban (3) hta, moi gaw, Alesia mying ai Alise mare hta shangai chyinghkai wa ai rai nga ai. Shi a shangai nhtoi gaw, shi a kanu a si ai nhtoi tai wa sai. Tara maigan masha rai nga ai Kawa gaw, Regina hpe shangai ya ai Hkristan Tsi Sarama hpe dai shaloi jang jaw kau ai. Sarama mung, ma ngai hpe Regina ngu shamying nna kashin kamun hkam ya sai. Kawa gaw, ma ngai Hkristan tai mat ai lam chye ai shaloi, ma hpe shi n hkap la mat nu ai. Dai zawn Kawa e kabai kau ai aten kaw nna, Regina gaw, Sarama hte rau Karai Kasang hta aten tup manoi manat let nga mat wa ai. Shi gaw, shaman chyeju law law hkam la lu nna, akyu hpyi shaja ai hte kaja ai asak hkrung lam hta nga sa lai wa sai.

Regina a asak (15) ning du ai shaloi, A.D (251) ning hta, Gaul mungdaw uphkang du Olybrius gaw, Regina hpe ning rum ning tau  shatai na hkyen wa ai. Regina gaw, shi a makam masham hpe mung, prat tup n nyet kau na hte uphkang du wa maw ai lam hpe tsep kawp myit n hkrum, n hkap la na nga nna daw dan wu ai. Dai majaw, Regina hpe htawng sharawng kau ma ai.

Regina gaw, Htawng kata kaw rawng ai aten hta, Shi a hkawnsek prat hpe n hkrit n tsang ai sha makawp maga da na hte shi a Hkristan makam masham hta prat tup manoi manat nga na matu myit jahkut tawn da ai. Dai majaw, uphkang du Olybrius gaw, ja ja rai gaya pawt pawt mat nna, Regina hpe laja lana zingri shatsang ai majaw, Regina nsa hti mat wa nu ai.

Regina n nga mat ai hpang, Nawku Hpung gaw, Shi hpe San Pra ai Masha dang dat let, Shi a Poi Nhtoi hpe mung, September shata (7) ya shani masat shagrau dat ya sai rai nga ai.

San Pra ai Hkawnsek Regina a labau hpe hkaja yu yang, Karai Kasang Wa hpe tsawra ai myit ngang ngang rai tawn da ai rai jang, tinang hkum hpe n kaja ai lam shagu kaw nna makawp maga da lu ai lam chye lu nga ga ai. Dai majaw, daini Nawku Hpung gaw, San Pra ai Hkawnsek Regina a Poi Nhtoi hpe galaw nga ga ai aten hta, Shi madun ya lai wa sai zawn, anhte a prat hta mung, makam masham myit shangang da let, agung alau lam ni hpe ning hkap kau nhtawm, Karai Kasang Wa hta sadi dung manoi manat nna sak hkrung hkawm sa ra nga ga ai.

By;

Sister Rose Angeline Maran Nang Doi (SFX)

RVA-Kachin Service (Myitkyina)