San Pra ai Raymond Nonnatus a Poi Nhtoi (August 31) 31 August 2022

San Pra ai Raymond Nonnatus a Poi Nhtoi (August 31)

San Pra ai Raymond Nonnatus gaw, 1204 ning hta Spain Mungdan, Portella Mare kaw shangai chyinghkai wa ai rai nga ai. Shi garai n shangai yang kanu si mat ai; dai majaw kanu a kan ga nna, Caesarean Operation hte shangai la ai majaw Nonnatus “Shangai ai n re” nga nna shamying ma ai. Shi gaw, Ma Shangai ya ai Sarama ni hpe Laksan Garum ya ai, “Patron of Midwives” rai nga ai.

San Pra ai Raymond gaw, Mercedarian Sasana Magam Gun Wuhpung shang langai mi mung rai nga ai. Mercedarian Sasana Wuhpung ni gaw, Moors amyu sha ni a lata kaw nna, rim hkrum, yam sha hkrum ai Hkristian ni hpe shalawt la lu na matu shakut ai Magam Gun Wuhpung ni rai nga ai.

San Pra ai Raymond gaw, brang ram ten hta Moors ni a lata kaw nna, Hkristian ni hpe hkyen la ai bungli a majaw, zingri hkrum ai, htawng sharawng hkrum ai. Kade zingri hkrum, dingbai dingna jaw hkrum timung, shi n hkrit n tsang ai; shi a bungli kaja a matu asum n jaw ai. Dip lu dip sha hkrum ai masha ni a matu jahkrit shama hkrum timung shi n tsang ai.

San Pra ai Raymond gaw, shi a asak (35) ning hta, Barcelona mare de bai du wa ai. Sarabyin Gregory (9) gaw shi hpe Cardinal Saradaw Kaba aya jaw shagrau sai. Raitimung, dai shagrau ya na lamang a matu, Roma mare sa wa ai hkrun lam kaw, Cardona mare hta e, 1240 ning, August shata (31) ya shani, Shi a asak (36) ning sha naw rai yang, Madu kaw yup pyaw ban san mat wa sai rai nga ai.

San Pra ai Raymond n nga mat ai hpang, 1657 ning hta dai aten na, Wa Sarabyin Alexander (7) kawn, shi hpe San Pra ai Masha dang dat let, Shi a Poi Nhtoi hpe mung, August (31) ya shani masat dat ya sai rai nga ai.

Daini Nawku Hpung gaw, San Pra ai Raymond Nonnatus a Poi Nhtoi hpe, galaw nga ga ai hte maren, anhte hpung masha ni mung, San Pra ai Raymond Nonnatus zawn, yawng a matu, akyu rawng ai magam lam ni hta grau nna shakut shang lawm nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)