San Pra ai Raymond Nonnatus a Poi Nhtoi (August 31)

San Pra ai Raymond Nonnatus gaw, 1204 ning hta Spain Mungdan, Portella Mare kaw dai daw wa ai rai nga ai. Shi garai n shangai yang kanu si mat ai; dai majaw kanu a kan ga nna, Caesarean Operation hte shangai la ai majaw Nonnatus “Shangai ai n re” nga nna shamying ma ai. Shi gaw, Ma Shangai ya ai Sarama ni hpe Laksan Garum ya ai, “Patron of Midwives” rai nga ai.

San Pra ai Raymond gaw, Mercedarian Sasana magam gun wuhpung shang langai mi mung rai nga ai. Mercedarian Sasana Wuhpung ni gaw, Moors amyu sha ni a lata kaw nna, rim hkrum, yam sha hkrum ai Hkristian ni hpe shalawt la lu na matu shakut ai Magam Gun Wuhpung ni rai nga ai.

San Pra ai Raymond gaw, brang ram ten hta Moors ni a lata kaw nna, Hkristian ni hpe hkyen la ai bungli a majaw, zingri hkrum ai, htawng sharawng hkrum ai. Kade zingri hkrum, dingbai dingna jaw hkrum timung, shi n hkrit n tsang ai; shi a bungli kaja na matu asum n jaw ai. Dip lu dip sha hkrum ai masha ni a matu jahkrit shama hkrum timung shi n tsang ai.

San Pra ai Raymond gaw, shi a asak (35) ning hta, Barselona mare de bai du wa ai. Sarabyin Gregory (IX) gaw shi hpe Cardinal Saradaw Kaba aya jaw shagrau sai. Raitimung, dai shagrau ya na lamang a matu, Roma mare sa wa ai hkrun lam kaw, Cardona mare kaw asak (36) ning sha naw rai yang, Madu kaw yup pyaw ban san mat wa sai rai nga ai.

San Pra ai Raymond n nga mat ai hpang, 1657 ning hta Shi hpe, Sarabyin Alexander (VII) kawn, San Pra ai Masha dang dat let, shi a poi nhtoi hpe August (31) ya shani masat dat ya sai rai nga ai.

Daini San Pra ai Raymond Nonnatus a poi nhtoi hpe, Nawku hpung kawn galaw nga ga ai hte maren, anhte hpung masha ni mung, mai kaja ai lam a matu gwi gwi rip rip hte galaw shakut lu na atsam hpe jaw ya u ga matu, San Pra ai Raymond hpang de akyu hpyi la nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)