San Pra ai Philip Neri a Poi Nhtoi (May 26) 26 May 2023

San Pra ai Philip Neri a Poi Nhtoi (May 26)

San Pra ai Philip Neri gaw, “Oratorians” ngu ai Magam Gun Wuhpung hpe gaw de hpang ya ai Jau langai mi rai nga ai. Shi gaw, 1515 ning, July shata (22) ya shani hta Italy Mungdan, Florence mare kaw e shangai chyinghkai wa ai rai nga ai. Shi a asak (18) ning du ai shaloi, mau hpa mabyin byin ai kaw nna Roma Mare de rawt sa mat wa ai. Shi gaw, matsan mayan re ai bu hpun palawng sha bu hpun da ai, shi sa nga ai nta kaw na ma kasha ni hpe laika hpaji sharin ya let, shi hkum nan a matu Myit Sawn Hpaji (Philosophy) hte Karai Hpaji (Theology) ni hpe hkaja la nga ai. Shi gaw, shi a laika hpaji hkaja ai lam hpe jahkring kau nna, lai kyang hten run taw nga ai Roma mare masha ni hpe sharin shaga mat wa ai shaloi, shi a hpaji machye machyang hpe shawa masha ni grau mau let shakawn ma ai.

Shi gaw, 1548 ning hta, “Chyoi Pra ai Marai Masum” (Confraternity of the Blessed Trinity) mying ai Magam Gun Wuhpung hpe gaw de dat ya sai. Dai Magam Gun Wuhpung gaw, makam masham hte seng ai bu hkawm masha ni, bai nna machyi makaw hkrum ai ni hpe yu gawn lajang garum jaw na matu yaw shada nna de da ai wuhpung rai nga ai. Shi ra sharawng dik ai gaw, Nawku Jawng Sanit “Visit to the Seven Churches” de sa gawan ai masing hte “Forty Hours” ngu ai Hking Hkum (40) Nawku ai Masing ni rai nga ai.

Shi a asak (36) ning hta Jau tai Sacramntu hpe hkam la lu ai hte rau “Congregation of the Oratory” Magam Gun Wuhpung hpe de hpang dat sai. Shi kaw mara sa raw nga ai ni a myit masin hpe chye ya lu ai shaman chyeju atsam lu ai majaw, masha law law teng sha myit malai lu mat wa ma ai. Shi gaw, jahpawt daw tup mara raw ya ai hpang, San Pra ai ni a lam myit sumru hkaja la nna Nawku Jawng kata shang nhtawm, akyu hpyi nna nga ai. Missa Hkungga nawng jau nga ai aten hta law law lang shi gaw, shing ran ni mu nna aten grai na hkra hkring mat mat rai wu ai.

1595 ning, May shata (26) ya shani, shi a mungkan asak hpang jahtum nhtoi shani tup shi mara raw ya kau da nhtawm, hpang jahtum shaman ngut ai hte “Jahtum e anhte si na hkrai rai ga ai.” (Last of all, we must die) nga nna jahtum ga tsun kau da wu ai.

Shi n nga mat ai hpang, 1615 ning, May shata (11) ya shani, dai aten na, Wa Sarabyin Pawlu (5) kawn, shi hpe A lu ai masha masat shagrau dat ya sai rai nga ai.

Dai hpang, 1622 ning, March shata (12) ya shani hta gaw, dai aten na Wa Sarabyin Gregory (15) kawn shi hpe, San Pra ai Masha dang dat let, Shi a Poi Nhtoi hpe mung, May shata (26) ya shani masat shagrau dat ya sai rai nga ai.

Daini Nawku Hpung gaw, San Pra ai Philip Neri a Poi Nhtoi hpe galaw nga ga ai aten hta, anhte Hpung Masha ni mung, Wa Jau Philip Neri zawn, Karai Kasang Wa anhte hpe jaw da sai dinghta asak hpang jahtum na aten du hkra, Shi Madu myit ai hku nna, sak hkrung hkawmsa chye ai ni byin tai lu hkra shakut sa wa nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)