San Pra ai Petronilla a Poi Nhtoi (May 31) 31 May 2023

San Pra ai Petronilla a Poi Nhtoi (May 31)

San Pra ai Petronilla gaw, shi a amyu shayi prat hpe asak jaw ap nawng kau nna, makawp maga da lu ai majaw, San Pra ai masha tai wa sai. Shi hpe Flaccus mying ai lusu ai masha langai mi gaw, ningrum ningtau shatai mayu wu ai. Raitimung, Petronilla gaw, shi hpe gara hku nna mung n tsawra, n hkungga lu ai majaw, Karai Kasang kaw akyu hpyi wu ai. Flaccus gaw, Petronilla hpe masum ya myit yu na ahkaw ahkang jaw ai hte maren, Petronilla gaw lusha gam akyu hpyi let dai nhtoi masum ya hpe shalai kau wu ai. Masum ya du tim, Petronilla a myit gaw, galai shai ai lam n nga, Shi a prat hpe Flaccus hpe n lu jaw ai lam ning dang tsun kau wu ai. Dai majaw, dai n hkru n kaja ai masha a lata kaw num n wa ai sha asak hte galai nna si hkam mat wa sai.

San Pra ai Petronilla gaw, agung alau ru yak jam jau ni kaw nna, Karai Kasang hpe kamhpa myit kaba hte garum chye hpyi la jang awng dang lam lu la ai ngu ai a kasi majing tai wa sai. Karai Kasang hpe kamhpa myit n rawng yang, shi gaw mazut la ai Flaccus a lata kaw jam jau hkrum ai hpang wenyi du hkra hkrat sum ai kaw du mat na sha rai nga ai.

Shi n nga mat ai hpang, Nawku Hpung gaw, Shi hpe San Pra ai Masha hku nna dang dat let, Shi a Poi Nhtoi hpe mung, May shata (31) ya shani, masat shagrau dat ya sai rai nga ai.

Daini Nawku Hpung gaw, San Pra ai Petronilla a Poi Nhtoi hpe galaw nga ga ai aten hta, anhte a prat hta mung, Karai Kasang wa jaw da ya sai, asak wenyi n hkrat sum mat hkra galoi mung sadi sahka let hkawm sa ng+a ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)