San Pra ai Peter Claver (September 9) 9 September 2022

San Pra ai Peter Claver (September 9)

San Pra ai Peter Claver hpe America mungdan na, Negro amyu sha ni laksan kamhpa ai San Pra ai Masha “Patron of the Negroes in America” ngu nna masat shagrau ai rai nga ai. Shi gaw, 1580 ning, June shata (26) ya shani hta Spain Mungdan, Verdu mare kaw shangai chyinghkai wa ai rai nga ai.

Shi a asak (20) ning du ai shaloi, New World ngu ai America Dan kaw Sasana magam gun mayu ai majaw, Jesuit Jau Wuhpung de shang mat wa ai. Shi hpe Colombia mungdaw, Cartegena mare de sa dat nna, dai yang Jau tai wa ai. Jau tai wa ai hte Africa mungdan na, Colony mungdan nnan de mayam shatai na matu, dut sha hkrum ai  matsan mayan re ai Negro amyu sha ni a matu, alak mi lit la nna bungli galaw ya ai.

Jau Peter Claver gaw, shi hkum hpe “Negro amyu sha ni a mayam” ngu shamying la ai. Shanhte hpe tara grai n hkaw yang, malu masha shawng jaw ya ai. Shi a manaw manang ni hpe “Ndai masha ni hpe n-gup aga hte grai ntsun dan yang, lata hte shanhte hpe shawng tsun dan ra ga ai. We must speak to them with our hands very we try to speak to them with our lips.” nga nna tsun ai.

Shi sak hkrung aten hta, Jau Peter Claver gaw mayam marai 300,000 hpe Kashin Kamun jaw da sai. Shanhte bungli galaw ai hkai sun hte Ja, Lung seng htu ai nhkun kata hkan du hkra sa gawan katsan ya lai wa sai. Shi gaw, lani mi hta nari hkum (15) daram mara raw dung ya ai, Nawku jawng hte gat hkan mung tara hkaw ai. Shi a sak hkrung nga ai laman Cartagena mare na shi e wenyi lam lajang ya hkrum ai masha kadai mung, sat shamyit ai n hkrum ma ai. Sat daw dan hkrum ai “Death Penalty” marai shagu hpe shi wenyi hte seng nna lajang ya dat lu sai.

Jau Peter Claver gaw, grai matsan mayan rai asak nga jahtum kau sai. Kadai mung, n yu lajang ai, tawn da hkrum ai hpang, 1654 ning, September shata (8) ya shani, shi a asak (74) ning hta, Madu kaw yup pyaw ban sa mat wa sai rai nga ai.

Jau Peter Claver gaw; “Ngai gaw, lawze a kasi hpe hkan galaw mayu ai; hpa majaw nga yang, shi gaw lawze sha rai nga ai majaw, kaning re ai mahkrum madup hte hkrum wa timung aput a ngun nga n galaw ai. Karai Kasang a amu gun ai wa mung dai zawn rai ra ai.” nga nna tsun tsun rai wu ai. “I wish to imitate the example of the ass. He never complains in any circumstances, for he is only an ass. So also must God’s servant be.”  

Jau Peter Claver n nga mat ai hpang, 1850 ning, July shata (20) ya shani, dai aten na, Wa Sarabyin Pius (9) gaw, shi hpe Alu ai masha hku nna masat dat sai rai nga ai.

Dai hpang, 1888 ning, January shata (15) ya shani, dai aten na, Wa Sarabyin Leo (13) gaw, shi hpe, San Pra ai Masha dang dat let, Shi a Poi Nhtoi hpe mung, September shata (9) ya shani masat dat ya sai rai nga ai.

Daini Nawku Hpung gaw, San Pra ai Jau Peter Claver a Poi Nhtoi hpe galaw nga ga ai aten hta, Wa Jau Peter Claver zawn, kaga masha ni a matu daw jau ya lu ai ni byin tai lu hkra shakut nga ga law.

By;

Sister Rose Angline Maran Nang Doi (SFX)

RVA-Kachin Service (Myitkyina)