San Pra ai Peter Chrysologus a Poi Nhtoi (July 30) 30 July 2022

San Pra ai Peter Chrysologus a Poi Nhtoi (July 30)

Ravena mare na, San Pra ai Saradaw Chrysologus gaw, A.D (406) ning htaw, Italy mungdan, Imola mare kaw shangai chyinghkai wa ai rai nga ai. Shi gaw, Ja Chyum Mungga sharin ngut ai hpang Deacon tai wa sai. A.D (424) ning hta, Ravena mare kaw na, Sara daw nsa hti mat wa ai. Dai shaloi, Imola mare na, Cornelius gaw shi hkum hpe grai htap htuk dum ai hte shi a ningtau Deacon hte rau, Sarabyin a madi shadaw lu la na matu Roma mare de sa du ma ai.

Dai aten na, Wa Sarabyin Sixtu (3) gaw, Ravena mare na, shawng ning nan na San Pra ai Saradaw Apollinaris a shingran mu ai majaw, Cornelius hpyi shawn ai hpe n madi shadaw ya ai sha Deacon hpe mahtang Saradaw lit dang dat ya sai. Peter mying hpe mung Chrysologus ngu nna shamying galai kau dat ya sai. Lachyum gaw, “Ja zawn Manu dan ai ga shaga ai Wa, Golden-speaker” ngu ai rai nga ai. Shi gaw, ga shaga ai hta grai byin ai wa rai nga ai. Madat nga ai shawa masha ni hpe tarahkaw ai shaloi, yawng chye na hkra kadun dawk ngu nna hkaw tsun chye ai wa rai nga ai. Madat taw ai ni, madat jin, tsu ba wa na hpe grai myit rau chye ya ai wa mung rai nga ai.

Saradaw Peter gaw, Chyoi Pra ai Hkum man man hkam la na matu shadut ai; Monophysism ngu ai “Karai Kasang Langai sha rai nga timung, masha hkrang hte re” nga ai shut shai sharin ai lam hpe ja ja ninghkap lai wa ai. Ndai zawn rai nna, Sagurem magam lit hpe gun hpai nga ai ten, A.D (450) ning, July (31) ya shani hta, San Pra ai Saradaw Peter Chrysologus gaw, Madu hta yup pyaw ban sa mat wa sai rai nga ai.

1729 ning hta, Shi hpe Doctor of the Church, “Nawku Hpung a Hpaji Ninghkring” langai hku nna masat shagrau hkum lai wa sai rai nga ai. Lai wa sai aten shi a Poi Nhtoi hpe Shi nnga mat wa ai July (31) ya shani galaw lai wa ai raitim, dai shani gaw, Loyala Mare na San Pra ai Ignatius a Poi nhtoi re majaw, 1969 ning hta gaw, Shi a Poi Nhtoi hpe July (30) ya shani de htawt sit galaw ai gaw, daini du hkra rai nga sai re.

Dai majaw, anhte hpung masha ni mung, lahta na Wa Saradaw zawn, manaw manang ni hpe grau tau chye lu ai atsam ni jaw ya mi ga matu akyu hpyi ga. Bai, shani shagu na San Pra ai ni a Labau kadun hpe hti sumru let, anhte a sak hkrung lam hpe n gun nnan ni bai ban la lu hkra shakut sa wa ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)