San Pra ai Paul Miki hte Manang ni a Poi Nhtoi (February 6) 06 February 2023

San Pra ai Paul Miki hte Manang ni a Poi Nhtoi (February 6)

San Pra ai Paul Miki gaw, Japan amyu sha ni kaw na makam masham a majaw, shawng nnan sat kau hkrum ai san pra ai masha rai nga ai. Shi gaw, 1564 ning hta, Japan Mungdan kaw shangai chyinghkai wa nu ai. Asak grai naw kaji ai ten kaw nna, Jesuit Jau Magam Gun Wuhpung de, shang nhtawm Kabu gara Shiga hpe tang du hkra, chye hkaw sharin la wu ai.

Chyoi Pra ai Kahtawlik Nawku Hpung gaw, ndai mabyin a shawng (50) ning jan kaw nna, Japan mungdan de du nga sai rai nga ai. Japan myusha Hpung masha ni Sen (2) du nga ai aten re. Raitimung, 1588 ning hta, Mungdan uphkang ai Hkawhkam Cambacundono gaw, shi a hkum hpe Karai re nga nhtawm Hkristian hpung magam gun ni yawng shata (6) laman Japan mung kaw nna pru mat wa ra na nga nna tara jahkrat ai. Dai majaw, Sasana magam gun nkau gaw, Hkawhkam hpe hkrit nna, hkan shatup ya ma ai. Brother Paul Miki hte kaga manang ni law law gaw, lagyim nna Japan Mungdan kaw nga nan ma ai.

1597 ning hta, Brother Paul Miki hte Shi a Manang marai (25) gaw, rim hkrum mat ma ai. Shanhte a na maga mi kahtam di kau ya nna, Nagasaki mare de rim mat wa ma ai. Lam ding yang, shawa ni e jahpoi asawng ai jahkrum ya ma ai.

Nagasaki mare kaw du ai shaloi, Jep shatsang nhtawm, tinang nang a Wudang hta gyit dun tawn ma ai. Shanhte a du kaw mung, hpri du gawp ni gyit noi da ya ma ai. Raitimung, shanhte a nden ja myit, makam masham myit kade kaba ngang grin ai lam hpe yu mau nma rai ma ai. Shanhte gaw, Kabu Gara rai n hkring n sa shakawn kungdawn mahkawn ni hpe mahkawn nna, Karai Kasang hpe shagrau ya let, Madu e na a lata hta anhte a wenyi ni hpe ap ya nga ga ai law, nga nna akyu hpyi ma ai.

Brother Paul Miki gaw, grai shing kang rawng ai Wudang makau kaw rawt tsap nhtawm, shawa masha ni hpe “Ngai gaw, Japan amyu sha majing re. Ngai gun hpai ai lit magam gaw, Jesuit Jau Magam gun Wunhpung a lit re. Madu Yesu a kabu gara shiga a marang e, ngai gaw, zingri sat shatsang ai hpe hkam nga n ngai. Ngai hpe sat shamyit ai hkaw hkam hte masha ni yawng hpe Ngai gaw, kabu gara myit hte mara raw hkyam sa jaw ya n ngai yaw. Shanhte mung, Kashin Kamun Sacramentu hkam la nna, Karai Kasang a kasha ni byin tai wa na matu shadut da n ngai yaw.” nga nna tsun kau da wu ai.

Dai zawn tsun shaga ngut ai hpang jang, Masha sat ai marai mali gaw, nri hte shanhte hpe galun sat kau manu ai. Shanhte chyawm gaw, myi man kaji mi mung n hten ai sha: “Yesu e, Maria” nga nna tsun nga ninglen 1597 ning February shata (5) ya shani hta nsa hti mat shajang ma ai.

Ndai Japan amyu sha ni hpe makam masham a majaw, sat kau hkrum ai San Pra ai Masha ni ngu nna, 1862 ning hta dai aten na Wa Sarabyin Pius (IX) kawn, masat shagrau dat ya sai rai nga ai.

Nawku hpung kaw nna, San Pra ai Paul Miki hte Manang ni a Poi hpe galaw nga ga ai aten hta, anhte prat hta mung, Makam Masham a majaw, kade mi zing ri zingrat lam hkrum sha wa ai raitim, tinang lu da sai makam masham hpe nyet kau ai lam n nga ai sha, grau ru jung ngang kang let hkawmsa nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)