San Pra ai Patrick a Poi Nhtoi (March 17)

San Pra ai Patrick hpe Ireland Mungdan a Kasa nga nna shagrau ai rai nga ai. Shi gaw, England mungdan kaw lai wa sai A.D 385 ning hta shangai chyinghkai wa ai rai nga ai. Shi a asak (17) ning du ai shaloi, Ireland Mungdan de mayam shatai nna dut kau hkrum nu ai. Ireland Mungdan hta mayan tai nna kawng ntsa hkan sagurem brang (6) ning tup galaw lai wa ai. Dai aten ni hta makam masham hpe shangang la nna, san seng san pra let nga lai wa sai. Shi gaw, mau hpa lamik kumla hte mayam prat kaw na lawt wa nhtawm, dai daw buga England Mungdan de bai du wa lu nu ai.

Dai daw buga de bai du wa ai hte kade nna yang, yupmang mu wu ai. Shi a yup mang gaw, “Ireland amyu sha ni gaw, shi hpe Ireland mungdan de bai sa nhtawm shanhte Irish amyu sha ni hpe, Karai Kasang a lam hkaw dan na matu sa hpyi shawn ai lam” mu wu ai.

Dai yup mang mu ngut ai hpang, Patrick gaw, England mungdan Lerins mare na, Jau Tai Dakkasu kaw sa lung ai. A.D 431 ning hta, Jau Tai Sacramentu hpe hkam la lu sai. Dai phang, shi hpe Ireland Mungdan de Sasana magam gun hpai na matu lit shatsam ai hkrum wu ai. Ireland Mungdan kaw du ai hpang shaning hta Sarabyin Celestine (I) gaw, shi hpe Saradaw aya tang dat ya nu ai.

Saradaw Patrick shawng nna sasana magam gun hpang ai gaw, Ireland mugndan dinghku maga, moi shawng de shi mayam naw tai nga yang Sagurem lai wa ai ginwang kaw rai nga ai. Ireland mungdan ting hta shi tara hkaw hkawm ai; shi a makam masham myit a majaw, Karai Kasang shi hpe lamik kumla hte nan garum nna masha law law makam masham de shang wa ma ai. Dai majaw, Nat dumsa ni hte Celtic (Moi na English amyu hpan mi) amyu sha ni gaw, shi hpe gyam sat kau na maw wa ma ai.

Lani mi hta shi gaw, leng jawn nna tara hkaw hkawm sa wa ai shaloi masha langai mi shi hpe shara galai ya na matu tsun ai majaw, shi shatai galai ya ai; dai shaloi shi a shara kaw galai jawn ai wa pala hkra nna si mat wa ai. Kaja wa gaw, pala dai Saradaw hpe nga nna lagyim gap da tai rai nga ai. Shaning (30) ning akyu hpyi shaja nna, sasana magam gun sahkut ai majaw, Ireland mungdan ting Sasana magam chyam bra wa nan grai rawt jat galu kaba wa sai.

A.D 461 ning hta Shi gaw, Ireland Mungdan na tsaw htum ai bum rai nga ai Aigli Bum ntsa kaw nna, Ireland mung chying sha ni hpe hpang jahtum shaman da ya sai. Dai bum nta kaw nhtoi (40) ya lusha gam tara shadik nga yang, shiran bai mu wu ai. Shi mu ai gaw, Irish amyu sha ni kaw na San Pra ai masha byin wa na masha hkying kaba gaw, “Nang gaw, anhte yawng a Kara rai nga ndai law” nga nna mahkawn shagrau ai hpe shingran mu ai. Dai hpang kade nna yang, madu kaw yup pyaw ban sa mat wa sai rai nga ai. Shi a hkum tsawp moimang hpe Sual ngu ai shara kaw na shi shawng gap shachyaw tawn da ai nawku jawng kaw lup makoi da sai rai nga ai.

Shi n nga mat ai hpang, Nawku hpung gaw, shi hpe e San Pra ai masha dang dat nna, shi a Poi Nhtoi hpe mung, March shata (17) ya shani ngu nna masat shagrau dat ya sai rai nga ai.

Daini Nawku Hpung gaw, Ireland Mungdan a Kasa rai nga ai, San Pra ai Saradaw Parick a Poi Nhtoi hpe galaw nga ga ai hta, anhte hpung masha ni mung, anhte hpe Karai Kasang Wa shadum ya nga ai, yup mang shingran ni hpe bai sawn sumru dinglik yu nna, anhte myit ra ai hku n rai, Shi Madu Karai Kasang Wa myit ra ai hku nna sak hkung hkawmsa ai ni byin tai lu hkra shakut nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)