San Pra ai Paschal Baylon a Poi Nhtoi (May 17) 17 May 2023

San Pra ai Paschal Baylon a Poi Nhtoi (May 17)

Hkungga tsawra ai Nuwa Hpunau ni, daini na Nawku Hpung a Labau shana ya na ten hta gaw, San Pra ai Paschal Baylon a Labau Kadun hpe mu hti hkaja la lu ai made mi gam garan ya na n ngai.

Nu Wa hpunau ni, anhte na la lu taw nga ai, San Pra ai masha ni law law hta tinang a lashum ga, manoi ga ni hte hkrat asak hkrung ai ni hpe na lu na ga ai re. Dai hte maren sha, San Pra ai Paschal mung, “Ngai gaw, matsan let shangai wa ai; dai majaw matsan jamjau hkam nna si na matu myit daw dan da n ngai.” nga nna ayan tsun ai wa rai nga ai. Shi hpe, Spain, Aragon hkawhkam a Mungdan na Torre Hermosa mare hta 1540 ning, May shata (16) ya shani, Martin hte Elizabeth Baylon yen kawn shangai chyinghkai wa ai rai nga ai. Paschal a Kanu yen Kawa gaw, matsan ai raitim, makam masham lam hta grai shakut ai yen mung rai nga ai.

San Pra ai Paschal Baylon gaw, ma kaji ten hta sagurem ai, kawng ntsa hkan sagurem let laika sharin hkaja hpang ai. Shi gaw, laika grai chye mayu ai majaw, sagurem hkawm timung, laika buk ayan hpai nna laika chye ai ni kaw laika sharin la nga ai. Shi hti ai laika ni mung makam masham hte seng ai laika buk ni sha rai nga ai majaw, shi a wenyi rawt jat lam a matu grai nan akyu jaw ya lu nga ai. Laika ni hti nna, myit sumru yu ai lam ni aten na na galaw lu ai majaw, shi a san seng san pra lam a matu n gun shajat ya ai; asim sha rai nga chye shangun wa ai.

Ndai zawn rai nna, 1564 ning, shi a asak (24) ning du ai shaloi gaw, Reformed Franciscan Wuhpung magam gun, Lay Brother “Jau n tai ai sha prat tup Brother sha tai ai Wuhpung” shang tai mat wa ai. Shi gaw, akyu hpyi shaja ai hte matsan mayan rai nga chye ai; shana ten malawng maga akyu hpyi nna, Nawku tawn a man kaw aten shama ai. Shi gaw, Chyoi Pra Hkum hte Nu Maria hpe alak mi nan hkungga tsawra kamhpa ai masha rai nga ai. Makam masham hte seng nna shingran ni law law hpe mung shi mu ga ai. Bai nna, shi gaw, Malu masha ni hpe majoi magawn mara lahpawt lama galoi n galaw ai. Matsan mayan re ai ni sa du garum hpyi ai aten ni hta mung, shawang tsawra myit hte garum shingtau chye ai wa mung rai nga ai.

Ya na zawn, kang ka sadi dung let Karai Kasang Wa a magam lit gun hpai taw nga ai aten, 1592 ning, May Shata (17) ya shani, Spain, Aragon hkawhkam a Mungdan, Vallerreal Mare hta sha Madu kaw e, yup pyaw ban san mat wa sai rai nga ai.

Shi hpe, 1618 ning, October shata (29) ya shani, Dai aten na Wa Sarabyin Pawlu (V) kawn A-lu ai masha hku nna masat shagrau dat sai rai nga ai.

Dai hpang, 1690 ning, October shata (16) ya shani hta, Wa Sarabyin Alexander (8) kaw nna, San Pra ai masha dang dat let, shi a poi nhtoi hpe May shata (17) ya shani masat dat ya sai rai nga ai. 

1897 ning hta gaw, San Pra ai Paschal Baylon hpe Mungdan ting hte seng ai Chyoi Pra ai Hkum Poi a laksan kam shamyet ai wa (Patron of Eucharistic Congresses) nga nna shingten amying jaw shagrau ya sai rai nga ai.

Bai 1961 ning, May shata (12) ya shani, San Pra ai Paschal hpe Wa Sarabyin Yawhan (23) kawn Spaing Mungdan, Segorbe Saradaw Ginwang a lak san kam shamyet ai wa (The patron for the Segorbe Diocese) ngu nna mung, masat shagrau dat sai rai nga ai.

          Hkungga ai Nuwa Hpung masha ni, lahta de anhte na la lu sai, San Pra ai Paschal Baylon hpe kasi yu la nna, anhte a prat hta, kade mi kin ai raitim, Karai Kasang hpe aten jaw lu hkra shakut let, anhte a wenyi grau nna n gun ja wa hkra shakut hkawmsa wa ga ngu, gam garan ya dat n ngai law.

By;

Sister Rose Angeline Maran Nang Doi (SFX)

RVA-Kachin Service (Myitkyina)

Source: https://www.franciscanmedia.org/saint-paschal-baylon/