San Pra ai Olympias a Poi Nhtoi (December 17) 17 December 2022

San Pra ai Olympias a Poi Nhtoi (December 17)

San Pra ai Olympias gaw, shi a prat hta matsan mayan re ai ni a matu madung tawn nna ap nawng magam gun hpai lai wa sai. Shi a ap nawng ai myit jasat gaw, shi a kaji kawoi, makin jinghku ni kaw nna lu la ai kasi ningli ni rai nga ai.

San Pra ai Olympias gaw, A.D 368 ning hta shangai chyinghkai wa ai. Shi a Kanu yan Kawa gaw, lusu nga pyaw ai sha n-ga, makam masham myit ja ai ni rai ma ai. Dai majaw, kaji ai aten kaw nna shi a makam masham myit gaw grai ngang ai. Shi gaw, San Pra ai Amphilocus a kanau jan rai nga ai Theodosia a lata kaw na Laika hpaji sharin let nga kaba wa ai majaw, kaji ten kaw nna sanseng sanpra ai myit ru jung nga sai.

Shi gaw, asak naw kaji ai ten kaw nna Hkawhkam Theodosius a sut lit hkam Nebridius kaw num wa ai. Shan gaw, kun dinghku de ai hpang kade nna yang Madu wa si mat wa sai. Olympias gaw, dinghku bai n de ai sha, Nawku Hpung hte matsan masha ni hpe galaw daw jau ai ta tut bungli hpe galaw na matu myit jahkut kau wu ai. Shi a Kanu yan Kawa kaw nna shi lu la ai ja sut gan kumhtaw ni gaw, shi ra sharawng ai shawa hpe galaw daw ai magam bungli a matu grai akyu rawng mat ai.

San Pra ai Olympias gaw, shi sharawng ai shawa hpe galaw daw ai amu awng dang na matu, Constantinople mare kaw na, Saradaw lahkawng a madi shadaw n gun jaw ai hpe lu la sai. Saradaw kaba Nectarius gaw shi hpe Nawku Hpung a matu matsan masha ni hpe galaw dau jaw ai Deaconess lit shatsam ya sai.

San Pra ai Saradaw Chrysostom mung, Olympias hpe garum jaw madi shadaw ya nna, shi a myit jasat hpe grai shakawn ya ai. Dai zawn rai nna, San Pra ai Chrysostom hpe Olympias e ja gumhpraw garum ya ai majaw, mayam law law hpe bai hkye la lu mat ai.

San Pra ai Olympias gaw, A.D 408 ning, July shata (25) ya shani, shi a asak (40) ning hta, Madu kaw yup pyaw ban sa mat wa sai rai nga ai.

San Pra ai Olympias  n nga mat ai hpang, Nawku Hpung gaw, Shi hpe San Pra ai Masha tang dat let, Shi a Poi Nhtoi hpe mung, December shata (17) ya shani masat shagrau dat ya sai rai nga ai.

Daini Nawku hpung gaw, San Pra ai Olympias a Poi Nhtoi hpe galaw nga ai aten, anhte a myit masin hta mung, yak hkak jam jau hkrum nga ai ni hpe tinang hta lu ai n gun atsam hte yu lakawn garum shingtau la nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)

#RVA_Kachin_Service

#Feastday_December17

#St_Olympias