San Pra ai Nicholas a Poi Nhtoi (December 6)

Hkrismat aten du shagu anhte a makau grup yin hta e, Santa Claus Sumla hpe mu lu taw nga ga ai re. Daini gaw, San Pra ai Nicholas (shing n rai) Santa Claus a Poi Nhtoi Shani rai nga ai.

Nu wa hpunau ni, Santa Claus nga nna masha malawng maga chye ai, San Pra ai Nicholas gaw, Asia Minor Mungdang (Ya na Turkey) kaw na Patara mare kaw tsa ban (3) hte (4) lapran hta shangai chyinghkai wa ai rai nga ai. Labau nkau mi hta ka da ai gaw, San Pra ai Nicholas gaw, lusu ai kun dinghku kaw na shangai chyinghkai wa ai lam ka da nga ai.

San Pra ai Nicholas gaw, Jau tai ai hpang, Turkey Mungdan, Myra mare na Saradaw aya shatsam ya hkrum sai. Shi a kanu yen kawa n nga mat ai hpang grau nna matsan mayan, n tai n mai re ai ni hpe ja gumhpraw garum ning tum, gam garan jaw ai lam ni galaw lai wa ai.

Kalang mi, Saradaw Nicholas gaw, nau matsan chye dum ai majaw mara kaba galaw maw ai masha langai mi hpe hkye la lai wa yu ai. Dai masha gaw, kasha shayi sha masum lu ai; shan nau ni nau matsan nna kadai mung n sa hpyi ai rai nga ai. Dai majaw, kawa gaw shan nau ni masum ting hpe shawa num galaw nna ja gumhpraw tam shangun na matu daw dan wu ai. Ndai lam hpe Saradaw Nicholas chye mat ai majaw, shana nsin, kadai mung n mu ai shaloi, dai shanwa ni a nta de gumhpraw ni lang n htawm sa wa wu ai.

Dai gumhpraw ni hpe hkuwawt hku nna kabai bang dat ya ai. Gumhpraw dai ni hpe lu la nna Ma Hkawn jan num wa lu sai. Dai hpang Ma Lu jan a matu lagyim nna gumhpraw kabai bang ya ai majaw, shi mung num wa lu mat ai. Hpang jahtum e shan nau ni a kawa gaw, mau mat nna, lagyim yu nga yang, Saradaw Nicholas hkum nan gumhpraw ni lagyim kabai bang dai hpe mu wu ai. Dai Shayi sha masum a kawa gaw, grai gaya mat nna, Saradaw hpe mung kaning nchye tsun mat hkra chyeju dum wu ai. Ndai lam gaw, Saradaw Nicholas a tau chye ai myit, matsan mayan ni hpe garum madi shadaw pawn ba la na matu jin jin re ai myit, dam lada ai myit masa ni hpe shadan shaleng ya ai lam rai nga ai.

Ya na zawn, Masha ni a ntsa Saradaw a matsan dum lama myit kaba ai shiga gaw, gau ngwi ngwi hte chyawm bra mat wa sai. Shawang tsawra myit kaba dik la ai, Saradaw Nicholas gaw, Sagurem lit magam gun hpai let, matsan mayan jam jau jam hkau hkrum ai ni hpe ding yang garum pawn ba la taw nga ai aten, A.D 350 ning hta Madu kaw e, yup pyaw ban sa mat wa sai rai nga ai.

San Pra ai Nicholas n nga mat wa ai raitim, shi a mai kaja dik ai myit masa, sat lawat ni hpe masha ni gau ngwi ngwi chye mat wa ai. Shi hpe Tsa ban (10) hpang de, Kahtawlik Nawku hpung kawn San Pra ai masha ngu nna, December (6) ya shani shagu masat shagrau hkrat wa sai rai nga ai.

Tsa ban (19) du ai shaloi Protestant (Kahtawlik Hpung kaw nna garan mat wa ai Hkristian hpung) kaw na Dutch Protestant hpung ni gaw, Saradaw Nicholas a mying hpe kadun ai hku nna Santa Claus ngu shamying ya nhtawm, Hkrismat kumhpa gam jaw ai wa, pyaw chye ai wa, nga nna shakawn shagrau hpang ya ma ai. Saradaw a daw hkrawng hte gupchyawp (Miter and Cape) kaw na maka gaw Saradaw Nicholas a palawng hkyeng ai matut kaw e, sagu mun hpraw hte chywi shakap da ai hpe yu nna lang hpang wa ai rai nga ai.

Dingdung maga hkyen bum hkan nga ai chyahkyi (Reindeer) hte wan wut kra nna wan hkut shapraw ai (Chimney) shara sumla lawm ai Hkrismat kumhpa ni hpe, kadai n mu ai sha sa tawn da ai ladat gaw, American laika ka ai Sara ni jahtuk nna shalat dat ai rai nga ai.

Santa Claus a sumla gaw, Hkrismat myit jasat rai nga ai hpu nau tsawra myit hte jaw lu jaw sha ai hpe shadan ya ai, lachyum grai sung ai lam rai nga ai hpe mungkan masha ni yawng hkap la ma ai. Ndai myit jasat gaw, masha yawng hpe gam garan ya mayu ai myit masin dawk bang ya ai, akyu shapraw ya ai masing langai mi nan mung rai nga ai ngu, gam garan ya dat lu n ngai law.

By;
Sister Rose Angeline Maran Nang Doi (SFX)
RVA-Kachin Service (Myitkyina)