San Pra ai Ni Yawng Mayawng a Poi Nhtoi (November 1) 01 November 2022

San Pra ai Ni Yawng Mayawng a Poi Nhtoi (November 1)

Nawku Hpung gaw, Shani Shagu November shata praw (1) ya shani hta San Pra ai Ni Yawng a Poi Nhtoi hpe galaw nga ga ai re. Moi shawng de gaw, makam masham a majaw, si hkam ai San Pra ai Masha ni hpe chyu sha masat shagrau galaw ma ai.

Raitimung, A.D (731) ning hta, Wa Sarabyin Gregory (3) gaw, San Pra ai Masha ni Yawng Mayawng a matu, San Pra ai Kasa Petru a Nawku Htingnu kata kaw Nawku Tawn langai mi lak san shaman masat ya ai kaw nna, Roma mare kaw, San Pra ai Masha Ni Yawng a Poi hpe masat galaw hpang wa sai rai nga ai.

A.D (837) ning hta, Wa Sarabyin Gregory (4) gaw, dai aten shi nga ai Fransik Mungdan ting kaw Dai Poi Nhtoi hpe n gun jaw let madi shadaw ya sai. Dai hpang, Nawku Hpung gaw, November shata praw (1) ya shani hta San Pra ai Ni Yawng hpe lak san myit dum shagrau shakawn ai poi nga nna masat galaw mat wa ai gaw, daini na aten du hkra rai nga ai.

Dai majaw, daini gaw, anhte San Pra ai ni a mying hpe la da ai Nawku Hpung Masha marai hkum shagu a Poi Nhtoi shani mung rai nga ai. Dai hpe myit dum let, anhte yawng mung, dinghta asak naw nga ai aten San Pra ai Masha ni hpe kasi kamang yu la nna, hkan sa shatup let, lani mi na aten hta, San Pra ai ni Yawng hte rau jawm pawng nga lu u ga matu mung, lak san akyu hpyi la nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)