San Pra Ai Ni A Labau ( 04 October 2021 )

Asisi Mare na San Pra ai Francis a Poi Nhtoi (October 4)

San Pra ai Francis gaw, 1182 ning hta Italy Mungdan, Asisi Mare kaw shangai chyinghkai wa ai rai nga ai. Shi gaw, Friars Minor, Tawra Jau Magam Gun Wuhpung hpe de da ai San Pra ai Jau rai nga ai. Shi gaw, grai lusu ai sut du langai mi a kasha mung re. Nnan daw e, shi gaw, mungkan a pyaw len lam ni hpe hkan nna, hpyen luksuk kaba aya hpe grai marin lai wa nu ai.

San Pra ai Francis shi a asak (25) ning du ai shaloi, lani mi na aten hta, San Damian Nawku Jawng kata kaw nna Madu Yesu shi hpe “Francis e, ya nang mu lu ai ndai Nye a Nawku Jawng hten run ni sai; dai hpe gram ya rit” nga nna shaga pru wa ai. Madu Yesu matsun ai hte maren San Pra ai Francis gaw, dai Nawku Jawng hpe grai tsawm hkra gram lajang ya sai.

Jau Francis gaw, matsan mayan re ai ni hpe buhpun palawng hte Ja Gumhpraw ni gam garan jaw ai. Dai majaw, shi a kawa gaw, shi hpe grai pawt let, Francis hpe jaw kau ai Sutgan ni hpe bai hpyi shatsang tsang rai wu ai.

Jau Francis mung, Saradaw a nta kaw nan shi bu hpun tawn ai buhpun ni hpe raw kau da nhtawm; “Ndai buhpun palawng ni mung na a rai nga ai. Ndai Mungkan ga ntsa e ngai gaw nang hpe “Wa” ngu nngai. Raitimung, yak aw nna gaw, Sumsing lamu na Nye a Wa e, ngu nna sha ngai shaga na ni ai” nga nna tsun ai.

San Pra ai Jau Francis gaw, hkyep din n lawm ai, aje amya re ai buhpun palawng ni hpe lawai nhtawm, shut hpyit mara arid an shatup let, akyu hpyi shakut ai lam hpe galaw hpang wa ai. Shi a myit jasat hte sat lawat ni hpe yu la mu la nna, masha law law shi a hpang hkan Jau ni tai wa ma ai.

Sarabyin Innocent (III) gaw, hten wa maw nga ai Nawk Hpung hpe Jau Francis bai gram lajang ya ai shing hpe mu ai. Dai majaw, shi gaw, Jau Francis woi hpaw hpang tawn ai Friars Minor Tawra Jau wuhpung hpe 1210 ning hta madi shadaw ya let wuhpung langai hku hpaw na matu ahkang jaw ya wu ai.

Jau Francis gaw, Deacon aya hkam la lu ai ten kaw nna lamik kumla law law madun ai shaman chyeju hkam la lu sai. Nawku Hpung kata na gram sharai ra ai lam ni hpe matsan mayan re ai myit jasat ladat hte kaja ai kasi kamang hkrang hte shading sharai ya sai. Hkum sai shan hte seng ai agung alau hpe ninghkap ai hku nna, ginhtawng ten hta buhpun palawng raw kau nhtawm ju sumwum ntsa yup ai; nshung ta hta hkyen prang kaw yup ai. Dingdung Africa mungdan kaw nga ai Muslim hpung shang ni hpe sa du jahkrum ai; shanhte gaw, shi a makam masham myit jasat hte ngasat ngasa lam ni hpe mu nna grai mau ma ai.

Ya ten hta, anhte galaw ai Hkrismat Lungpu hpe Jau Francis galaw hpang ai rai nga ai. Lani mi hta, Averna Bum ntsa kaw shi akyu hpyi let myit sumru yu nga yang, Madu Yesu a nni nkri nma hkang ni shi kaw kap wa ai. Dai bum ntsa kaw, “Hpu Ba Jan hte Ah Shawng Shata (Brother Sun and Sister Moon)” ngu ai mahkawn mangwi hpe shi ka shahtuk da sai. Mahkawn dai gaw, Karai Kasang hpan da ai Jan shata ni a tsawm la ai shingran ni hpe shakawn mahkawn da ai rai nga ai.

San Pra ai Jau Francis gaw, 1226 ning, October shata praw (3) ya shani, Shi a asak Asak (44) ning hta Madu kaw yup pyaw wa sai rai nga ai. Jau Francis gaw, shi a lawu na Tawra Jau ni hpe: “Ngai hpe shatsam ya ai lit magam ni hpe ngai gun hpai ni ai. Nanhte ngai hpu ngai nau ni mung, Karai Kasang shatsam tawn ai magam bungli ni hpe atsawm sha gun hpai lu na matu, Madu Yesu sharin achyin ya, n gun atsam jaw ya u ga law!” nga nna hpang jahtum shakram kau da nhtawm nsa hti mat wa sai rai nga ai.

Jau Francis n nga mat ai hpang, 1228 ning, July shata (16) ya shani, dai aten na Wa Sarabyin Gregory (IX) kawn shi hpe San Pra ai Masha dang dat let, Shi a Poi Nhtoi hpe mung, October shata Praw (4) ya shani masat shagrau dat ya sai rai nga ai.

By;

Sister Rose Angeline Maran Nang Doi (SFX)

RVA-Kachin Service (Myitkyina)