San Pra ai Nereus hte Achilleus Yan a Poi Nhtoi (May 12) 12 May 2023

San Pra ai Nereus hte Achilleus Yan a Poi Nhtoi (May 12)

San Pra ai Nereus hte Achilleus yan gaw, Roma Tara Rung Praetoria kaw na magrau grang ai hpyen ma yan rai nga ai.

Ndai hpyen la yan gaw, Hkristan Makam Masham de du wa ai hpang akyu hpyi shaja ai hte ru yak jam jau lam ni hpe hkam sharang let nga lai wa ma ai. Karai Kasang hte grau ni ni htep htep nga mayu ai majaw, hpyen dap kaw jahkrit shama let matut nna nga shangun timung, shinggan pru mat ma ai. Dai majaw, shan gaw Terracina zinlawng de sa yen nga ra mat ma ai. Dai yang e, akyu hpyi shaja let tinang hkum hpe ning dang ai amu galaw shatup nna sa nga ma ai. Shan gaw, lani hte lani grau nna san pra wa ma ai; masha law law Hkristan makam masham hpe hkap la na matu shan aten tup akyu hpyi let amu galaw ma ai.

Hkawhkam Trajan uphkang ai aten hta Hkristan makam masham hpe hkap la ai ni hpe sat shamyit ai kaw Nereus hte Achilleus mung lawm mat wa ma ai. Shan gaw, makam masham a majaw, baw kahtam daw sat kau hkrum lai wa ai san pra ai masha yan tai wa masai.

Ndai San Pra ai masha yan a moi mang hpe Ardeatine Way ngu ai shara kaw na, Domitilla mying ai lupwa hta e makoi mayang da nga ma ai. Shan hpe hkungga shagrau ai hku nna, Nawku Htingnu Kaba (Basilica) langai mi gaw gap da nga ai. Shan lahkawng si mat wa ai masat ding sat nhtoi shani hta e, San pra ai Wa Sarabyin Gregory the Great gaw; “Ya anhte a man kaw du shajang nga ai san pra ai yan gaw, pyaw hpa hte sutgan, mungkan sak hkrung lam jaw ai gingding aga ndai hpe shan lahkawng n sharawng mat nna, shan a lagaw hte kabye tawn kau da manu ai.” nga nna mungga htawn tsun wu ai.

Shan lahkawng makam masham a majaw, sat kau hkrum ai hpang, Nawku Kawn shan lahkawng hpe, San Pra ai Masha dang dat let, shan lahkawng a poi nhtoi hpe mung, May shata (12) ya shani ngu masat shagrau dat ya sai rai nga ai.

Daini Nawku Hpung gaw, San Pra ai Nereus hte Achilleus yan a poi nhtoi hpe galaw nga ga ai aten, anhte a prat hta mung, Karai Kasang WA a magam bungli hpe gun hpai na matu, galoi aten hta raitim, hpang hkrat ngu ai n nga ai re majaw, shang lawm gun hpai lu hkra shakut sa wa ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)