San Pra ai Nathalia, Aurelius, Liliosa, Felix hte George Ni Poi Nhtoi (July 27)

Spaing Mungdan, Cordova Ginwang hpe Moslem hpung masha ni nnan uphkang ai tsan ban (8) hta, Hkristian Hpung masha ni gaw, tinang a makam masham hpe wanglu wanglang hkan shatup lu ma ai. Rai timung, Moslem ningbaw ningla ni a lata kaw uphkang na ahkaw ahkang yawng du mat wa ai shaloi gaw, Hkristian ni hpe da sang masing jahkrat nhtawm zingri sat shamyit ai lam galaw wa ma ai. Ndai kaw mu hti ai masham a majaw sat kau hkrum ai ni a labau ka kau da ai. Toredo mare na, San Pra ai Saradaw Kaba Eulogius gaw, zingri shamyit hkrum ai ni kaw na myit kaba ai ni hta malawm langai mi re.

Nathalia hte shi a madu wa Aurelius gaw, Moslem hpung kaw na Hkristian Hpung de gale shang wa ai yan rai ma ai. Shan gaw, Moslem hpung shang naw rai nga ai aten kaw nna Kahtawlik makam masham lam hpe sharawng shara hkaja la ma ai. Kahtawlik Hpung masha langai mi shawa hpawng kaw shi a makam masham a majaw zingri shatsang ai hpe myit galu rai hkam la nga ai hpe Aurelius mu wu ai. Dai hpang Aurelius gaw, shi a madu jan hte rau Kahtawlik Makam Masham hpe n hkrit n tsang sha hkap la let shatup wa ma ai.

Aurelius hte Nathalia yan a Kahtawlik makam masham myit jasat hpe mu nna shan a htingbu Felix hte shi a madu jan Liliosa yen mung Kahtawlik makam masham hpe shawa masha ni a man e n hkrit n tsang ai sha hkan shatup ma ai. Ndai kun dinhgku lahkawng gaw, htawng sharawng da hkrum ai masha ni hpe Kabu Gara Shiga hkaw sharin ya na matu myit daw dan jahkrup la ma ai.

Rai timung, dai htinggaw lahkawng hpe Moslem hpung htak ai mara a majaw ngu, rim la kau ma ai. Shanhte hte arau rai nna, Yerusalem mare, St.Sabas tara jawng kaw na Mawhpyi George mung rim hkrum wu ai. Shi gaw Kahtawlik makam masham a matu asak ap nawng kau mayu ai myit a majaw Cadi uphkang du kaba a man kaw na Mohammed a lam jahpoi asawng ga tsun wu ai. Ndai San Pra ai masha marai (5) hpe A.D 852 ning, July shata (27) ya shani, Kahtawlik makam masham hkap la ai majaw, sat shamyit kau ma ai.

Dai majaw, Nawku hpung kaw nna, Makam masham a majaw sat kau hkrum lai wa sai San Pra ai Nathalia, Aurelius, Liliosa, Felix hte George ni a poi nhtoi hpe July shata (27) ya shani, shaning shagu galaw ya taw ai rai nga ai. Anhte hpung masha ni shanhte a kasi hpe la nna, tinang a makam masham hpe galoi mung, gwi gwi sak se hkam let hkawmsa lu hkra shakut nga ga law. 

By; 

Sister Rose Angeline Maran Nang Doi (SFX)

RVA-Kachin Service (Myitkyina)