San Pra Ai Mutien Marie Wiaux A Poi Nhtoi ( January 30 ) 30 January 2023

San Pra Ai Mutien Marie Wiaux A Poi Nhtoi ( January 30 )

          San Pra ai Mutien Marie Wiaux hpe “Brother Akyu Hpyi Shaja” nga nna shakawn shagrau ya ma ai lam chye lu ai. Shi gaw Rosary Akyu hpyi ai lam hte Chyoipra  Hkum kawan hkungga ai lam hpe galaw shaja ai majaw ndai zawn shakawn shamying hkrum ai mung rai nga ai.

          Shingrai, Brother Mutien gaw Belgium mung Mellet mare kaw 1841 ning March shata (20) ya shani shangai chyinghkai wa ai rai nga ai. Shi a kanu yan kawa gaw makam masham lam hta grai shakut shaja ai ni rai ma ai. Shan nau ni marai (6) rai nga ma ai. Shi a kawa gaw ndup amu galaw ai majaw shi kaji ten kaw nna kawa hpe ndup amu garum ya nga ai lam chye lu ai. Asak ram wa ai shaloi, shi gaw Brother Of Christian Schools ( De La Salle Brother ) wuphung kaw brother sa tai mat nna kahta na hte maren shi a mying shanying la nu ai. Brother tai ai hpang (59) ning tup masha ni hpe madum sumpyi, mahkawn mangoi hte sumla soi ai hpaji ni sharin ya sai rai nga ai.

          Shingrai shi gaw, asim sha nga ai myit jasat, madat mara ai myit masa, aten hpe akyu hpyi nna shama ai myit jasat ni hte seng nna jawngma ni hpe hpaji sharin ya ai shaloi tang du hkra sharin ya chye ai atsam rawng ai wa mung rai nga ai. Shi kaw hpaji sa sharin la ai jawngma  ni gaw ndai zawn re ai shi a kasi kaja ni hpe ayan mu lu ma ai. Ndai zawn shi a si mani ai nsam, tsawra matsan dum chye ai myit a majaw shi a jawngma ni law law gaw Karai Kasang hpang de du wa lu ma ai lam labau hta ka matsing da nga mali ai re.

          Shingrai, Brother Mutien gaw, grai na hkra nmachyi ai sha madu a shaning 1917 ning  January shata (30) ya shani Madu hta yup pyaw ban sa mat wa sai rai nga ai. Shi hpe 1977 ning October shata (30) ya shani Wa Sarabyin Pawlu (6) kawn Alu ai masha shatai ai, Beatification masat shagrau ya sai rai nga ai. Dai hpang 1989 ning December shata (10) ya shani Wa Sarabyin Yawhan Pawlu (2) kawn shi hpe Canonization madang hte San Pra ai Masha ngu masat shagrau dat ya sai rai nga ai.

          Shingrai, daini nawku hpung gaw San Pra ai Mutien Marie Wiaux a poi nhtoi hpe galaw nga ai ten, anhte yawng mung shi a kasi ningli ni hpe yu la nna, tinang a prat hta akyu rawng hku jai lang lu hkra shakut sa wa ga ngu n gun jaw dat lu nngai law.

By;

Sister Rose Angeline Maran Nang Doi (SFX)

RVA-Kachin Service (Myitkyina)