San Pra ai Monica a Poi Nhtoi (August 27) 27 August 2023

San Pra ai Monica a Poi Nhtoi (August 27)

San Pra ai Monica gaw, San pra ai Augustine a kanu rai nga ai. Shi gaw, A.D (331) ning hta Dingdung Africa, Tagste mare kaw e shangai chyinghkai wa rai nga ai. Monica a myit galu ai hte akyu hpyi shaja ai lam ni a majaw, shi a grai myit ja ai tara maigan myusha madu wa Patricius mung, si na shawng shaning hta sha kashin kamun hkam nna si mat wa sai rai nga ai.

Monica a kasha kaba htum rai nga ai, Augustine gaw, mang hkang kaba tai ai: shi hpe ma kaji ten hta tara laika sharin shangun yu sai, raitimung, Augustine gaw Sacramentu a ahkyak ai lam hpe ahkyak n tawn ai. Mungkan pyaw len lam hte lagawn lamawn rai nga ai myit jasat gaw, n kaja ai tara lang ai Manichean wuhpung de shi shang ai shaloi, shi hkum shi uphkang n lu hkra mara shalaw la ai daw de du mat wa ai.

San Pra ai Monica a Kasha Augustine gaw, Shi a asak (19) ning hta Carthage mare kaw jawng lung nga yang, numsha langai mi hte Adeodatus mying ai ma langai lu mat ai. Kanu Monica gaw, Lusha gam, jam jau hkam, akyu hpyi shaja, myi prwi si hte kasha myit malai lu wa na matu aten tup shakut ai. Lani mi hta, San Pra ai Monica gaw, Saradaw langai mi hpe shaga la nhtawm kasha Augustine hpe sharin ya na hpyi nem ai. Shaloi hpaji kung zet ai Saradaw gaw: “Karai Kasang a aten du wa na ra ai. Myi prwi si shade de hkrat ai kanu a kasha gaw, hten bya na n rai nga ai.” (God’s time will come. It is not possible that the son many tears should perish.) nga nna tsun ai.

Augustine gaw, Kanu n chye ai sha Italy mung de sa mat ai shaloi, Kanu San Pra ai Monica gaw, kasha a hpang Milan mare du hkra hkan sagawn sa wa ai. Dai shaloi hta e, San Pra ai Monica myit pyaw dik mat nu ai, hpa majaw nga yang, Kasha Augustine myit malai lu mat, masha kaja tai mat sai majaw rai nga ai. Shan-nu gaw, Africa de bai nhtang wa na matu Ostia sanghpaw daru kaw sanghpawng la nga yang, San Pra ai Monica laja lana machyi hkrum wa nu ai.

San Pra ai Monica gaw, hpang jahtum ga hku nna: “Ngai sha e, ndai ginding aga ntsa ndai daram myit pyaw ai hpe nu galoi n hkam sha ga n ngai. Nu a sak hkrung ten tup, nu gaw ma hpe Kahtawlik Hkristian masha tai, sumsing lamu ja mungdan a kasha tai ai hpe sha mu mayu ai re. Nu a hkum tsawp hpe Nu a kasha, nang ra ai shara kaw makoi mayang u le yaw. Ma hpe nu langai sha hpyi kau da na: Nu hpe Madu a Nawku Tawn Hkungri man kaw dum nga rit yaw.” (One thing only I ask of you, that you remember me at the altar of the Lord) ngu nna hpang jahtum tsun kau da ai.

San Pra ai Monica gaw, shi a asak (55) ning hta, Madu kaw Yup pyaw ban sa mat wa sai rai nga ai. Shi hpe “Kanu ni Laksan Kam Shamyet lu ai San Pra ai Masha” Patroness of Mothers, nga nna shagrau masat hkungga jaw nga ga ai re.

San Pra ai Augustine tai wa ai San Pra ai Monica a kasha gaw, shi nan ka da ai, “Confessions = Mara Hkam La Ai” laika hta: “Nye a majaw shaning law law myi prwi si hkrat kau ai nu a matu, nari hkying hkum mi hkrap kau ai gaw n shut dum n ngai.” nga nna ka da nga ai.

Kanu San Pra ai Monica a akyu hpyi nsen ni a marang e, myit n su dik ai Kasha Augustine mung, A.D (395) ning hta Hippo mare na Sagurem Kaja Saradaw tai wa sai sha n-ga, Nawku Hpung a mying dang hkung ai Laika ka Sara hte San Pra ai masha langai mung tai wa sai rai nga ai.

San Pra ai Monica n nga mat ai hpang, Nawku Hpung kawn shi hpe San Pra ai Masha dang dat let, Shi a Poi Nhtoi hpe hpe mung, August shata (27) ya shani masat shagrau dat ya sai rai nga ai.

Daini Nawku Hpung gaw, San Pra ai Monica Poi Nhtoi hpe galaw nga ga ai aten hta, anhte marai hkum shagu mung, tinang a dum nta masha ni hta na myit n su ai masha langai ngai a matu akyu hpyi garum ya ai shaloi myit daw myit htum n rai mat na matu n gun jaw shadum ya nga ai re. Anhte a akyu hpyi nsen hpe Karai Kasang Wa teng sha hkap la ai ngu ai lam hpe, San Pra ai Monica hkum nan sakse madun lai wa sai hpe myit dum mai nga ga ai.

By;

Sister Rose Angeline Maran Nang Doi (SFX)

RVA-Kachin Service (Myitkyina)