San Pra ai Mika-el, Gabri-el hte Rapha-el ni a Poi Nhtoi (September 29) 29 September 2022

San Pra ai Mika-el, Gabri-el hte Rapha-el ni a Poi Nhtoi (September 29)

Lamu Kasa ni gaw, ginding aga hpe garai n hpan da ai aten kaw nna, Karai Kasang hpan da ai wenyi asak hte re ai ni rai nga ma ai. Shanhte gaw, shinggyim masha ni zawn hkum hkrang n lu ma ai; si htum ngu ai mung n nga ma ai. Shanhte gun hpai ai lit hte maren shanhte hpe shamying ya ai rai nga ai.

Mika-el ngu ai gaw, satan hpe gasat shamying na lit shatsam hkrum ai majaw, “Karai Kasang zawn kadai rai a ta” (Who is like God?) nga ai lachyum re. Karai Kasang gaw, Mika-el hpe, Karai Kasang a shingkang shingwang hpe ninghkap ai Satan Lucifer hpe, pyaw la ai paradisu shara kaw nna gawt shapraw shangun ai. “Sumsing lamu kaw majan gasat nga ai; Mika-el hte shi a ali alam ni gaw, dai baren numraw hte gasat nga ma ai; raitimung shanhte n dang lu ma ai rai nna, sumsing lamu e shanhte a matu nga shara n nga mat manu ai.” (Shingran 12:7-8)

Lamu Kasa Mika-el gaw, shani shagu anhte hkrum ai satan n hkalem hkalau ai agung alau shagu kaw nna makawp maga ya nga ai. Shingran laika na hte maren jahtum e, “Satan gaw agrawp shamyit kau ai hkrum na sha rai nga ai.” (Shingran 20: 10)

Lamu Kasa Gabri-el gaw, Karai Kasang a hpung shingkang shadan shapraw ya na lit shatsam hkrum ai; dai majaw Gabri-el, “Karai Kasang a Atsam Marai” Power of God ngu ai lachyum rai nga ai. Shi gaw, Nu Maria hpe Madu Yesu shangai wa na shiga sa shana na lit shatsam hkrum ai. Nu Maria gaw….shayi hkawn jet she re ngu nna bai htai ai shaloi, “Karai Kasang a matu n mai bin ai hpa mung n nga ai.” nga nna Gabriel bai htan ya ai. (Luka 1:37)

Lamu Kasa Gabri-el gaw, myit daw myit htum na zawn re ai shaloi, anhte hpe garum ya ai, Kabu Gara Shiga hkaw shabra ai ni hpe lak san garum jaw ya ai rai nga ai.

Lamu Kasa Rapha-el gaw, hkum hkrang hte wenyi machyi makaw hpe tsi shamai ya na lit shatsam hkrum ai. Shi a mying a lachyum gaw, “Karai Kasang a tsi mawan, Medicine of God” nga ai rai nga ai. Shi gaw, Tobiya hpe tsasam mungdan de sa ai hkrun lam hta lam woi ning shawng tai ya ai hte hkungran ai shana e, Tobiya hpe satan a mahkam kaw na hkye mawai makawp maga da ya sai rai nga ai. Tobiya a Kawa hpe mung, mi bai mu lu hkra tsi shamai ya sai. Shi a hkum hte seng nna, “Nye a ming Rapha-el re; Karai Kasang a shingkang shingwang rawng ai man kaw, amu gun ai lamu kasa sanit kaw na, langai mi rai n ngai” ngu wu ai. (Tobit 12:14)

Daini Nawku hpung kaw nna, Lamu Kasa Mika-el, Gabri-el hte Rapha-el ni a Poi Nhtoi hpe galaw nga ai hte maren, anhte prat hta myit ru myit tsang, machyi makaw hkrum wa ai aten ni hta, Karai Kasang Wa a sin nga ai Lamu Kasa ni marai masum gaw, galoi mung bau sin makawp maga ya la myit ga matu, lak san akyu hpyi la nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)