San Pra ai Miguel Cordero a Poi Nhtoi (February 9)

San Pra ai Miguel Cordero gaw, Ecuador Mungdan, Cuenca Mare kaw na, dinghku nga pyaw ai Kanu Kawa ni kawn lai wa sai 1854 ning, November shata (7) ya shani shangai chyinghkai wa ai rai nga ai. Shi a kashin kamun mying gaw, Francisco Febres Cordero Munoz rai nga ai.

Shi gaw, Ma kaji ten kaw nna, Madu Karai Kasang kaw nna lamik kumla law law langa shi kaw byin pru lai wa ai. Shi a asak (5) ning du ai shaloi, shanhte a nta wang kata kaw, Nu Maria hpe mu dat ai kawn sha shi chye tsap wa ai. Grai li ai arung arai hte laja lana gamyet da hkrum maw ai kaw nna dumsu la langai mi, alak mi rai nna hkye la ai hpe mung hkrum lai wa sai.

San Pra ai Miguel Cordero gaw, Ecuador mungdan kaw na, Hkristan Brother magam gun wuhpung de shang ai hpang, laika sharin ai lam ni hta alak mi atsam rawng wa ai rai nga ai. “National Academy of Letters” ngu ai amyu sha ni hte seng ai Laika buk ni, hti chyai na laili laika ni, ga shagawp ni, makam masham hte seng ai mahkawn mangoi ni, shangwi shapyaw ai lam hkrang shalat ai laika buk ni (Plays) law law ni ka da lai wa sai rai nga ai. Laili laika hte nna amu kade law timung, ma kaji ni hte seng nna lit magam ni grai la lai wa sai. Ma ni hpe shawng na Chyoi Pra Hkum hkam lu na matu lajang ya ai amu magam, tara ga sharin ai amu hte wenyi myit sumru yu ai lamang (Wutsawk) ni hpe woi galaw lai wa ai.  

San Pra ai Miguel Cordero gaw, 1910 ning, February shata (9) ya shani Spain Mungdan, Bardelona mare kaw e, Madu hta yup pyaw ban sa mat wa sai rai nga ai. Shi a moimang hpe Ecuador Mugndan de, bai la wa ma ai. Ecuador Mungdan asuya gaw, shanhte a mungdan kaw lang ai laika shagun yang na dazik (Stamp) kaw shi a sumla shakap ya ma ai. Shi a (100) ning ladu hkrum masat dingsat hku nna myit dum shagrau hkungga ai masat masa shadaw (Monument) hpe mung galaw da ya masai.

San Pra ai Miguel Cordero n nga mat ai hpang, 1977 ning, October shata (30) ya shani hta, dai aten na Wa Sarabyin Pawlu (VI) hku nna, shi hpe A Lu ai masha ngu masat dat ya sai rai nga ai.

Bai nna, 1984 ning, October shata (21) ya shani hta gaw, dai aten na Wa Sarabyin Yawhan Pawlu (II) kawn, shi hpe San Pra ai masha dang dat let, shi a Poi Nhtoi hpe mung, February shata (9) ya ngu masat shagrau dat sai rai nga ai.

Daini Nawku Hpung gaw, San Pra ai Miguel Cordero a Poi Nhtoi hpe galaw nga ga ai aten, anhte marai hkum shagu mung, ya aten byin nga ai Mungdan kata na kahtat kamawt lam ni lawan zim mat wa nna, ngwi pyaw simsa ai mungdan byin tai wa lu u ga matu, lak san akyu hpyi nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)