San Pra ai Michael de Sanctis a Poi Nhtoi (April 10) 10 April 2023

online image

San Pra ai Michael de Sanctis a Poi Nhtoi (April 10)

San Pra ai Michael de Sanctis gaw, Madu a shaning 1591 ning, September shata (29) ya shani, Spain Mungdan, Catalonia Mare kaw shangai chyinghkai wa ai rai nga ai. Shi a asak (6) ning kaw na shi a Kanu yan Kawa hpe Jau tai mayu ai lam tsun dan ai raitimung, dai hpang kade nna yang Kanu yan Kawa n nga mat wa sai rai nga ai. Dai majaw, shi gaw, hpaga la lauban langai mi a hpang hkan tai nna kan bau amu galaw wu ai. Kan ban amu magam galaw nga ai ten hta shi gaw akyu hpyi shaja ai hte, makam masham lam hta kang ka rai nga wu ai. Shi gaw, Asisi Mare kaw na San Pra ai Francis hpe grai hkan shagrau ai wa rai nga ai.

Madu a shaning 1603 ning hta shi gaw, Barcelona mare kaw na, Trinitarian Tawra Jau Jawng de shang mat wa nhtawm 1607 ning hta Spain Mungdan, Saragossa mare na, San Pra ai Lambert Tawra Jau Jawng kaw hpung magam gun ga sadi “Vow” hkam la wu ai.

San Pra ai Michael de Sanctis gaw, hkansa ritkawp tara nnan hte re ai Trinitarian Tawra Jau Jawng de Madrid Mare kaw nna shang wa ai rai nga ai. Dai hpang Seville hte Salamanca Mare kaw laika hpaji sharin la ngut ai hpang Jau Shatai Sacramentu hpe hkam la lu nu ai. Shi gaw, Villadolid mare na Jau Jawng kaw lit hkam Jau hku nna Lahkawng lang numdaw magam gun lai wa sai rai nga ai.

San Pra ai Michael de Sanctis gaw, Chyoi Pra Hkum hpe alak mi rai nna kam shamyet wu ai. Shi Misa Hkungga Nawng Jau ai law law lang hta Shingran (Ecstasy) mu mu rai wu ai. Dai majaw, shi a manaw manang Jau ni gaw, shi hpe San Pra ai Masha nga nna hkap la ma ai.

San Pra ai Michael de Sanctis gaw, Madu a shaning 1625 ning, April shata (10) ya shani, Madu hta yup pyaw ban sa mat wa sai rai nga ai.

Shi n nga mat ai hpang, Lamik kumla amyu myu mung madun lai wa sai rai nga ai. Dai majaw, Madu a shaning 1779 ning, May (24) ya shani, dai aten na Wa Sarabyin Pius (6) kawn, Shi hpe A Lu ai masha ngu shagrau dat ya sai rai nga ai.

Dai hpang, Madu a shaning 1862 ning, June shata (8) ya shani hta gaw, dai aten na Wa Sarabyin Pius (9) kawn, Shi hpe San Pra ai Masha dang dat let, Shi a Poi Nhtoi hpe mung, April shata (10) ya shani ngu masat shagrau dat ya sai rai nga ai.

Daini Nawku gaw, San Pra ai Michael de Sanctis a Poi hpe galaw nga ai aten hta, anhte marai hkum shagu mung, tinang prat hta kade mi ru yak jam jau lam hte hkrum katut wa ai raitim, tinang byin mayu ai, du mayu ai ban dung de, du lu na matu, Karai Kasang Wa kaw ap da let, San Pra ai Michael de Sanctis zawn shakut sa wa ga ngu, n gun jaw dat lu n ngai law.

 

By;

Sister Rose Angeline Maran Nang Doi (SFX)

RVA-Kachin Service (Myitkyina)

 

Add new comment

1 + 10 =