San Pra ai Medard a Poi Nhtoi (June 08) 08 June 2023

San Pra ai Medard a Poi Nhtoi (June 08)

San Pra ai Medard gaw, Madu a shaning 456 ning daram hta Fransik Mungdan, Picady Ginwang, Salency mare kaw shangai chyinghkai wa ai rai nga ai. Shi gaw, kaji ai aten kaw na, makam masham ngang ai Kanu yan Kawa a sharin shaga ai n pu hta kaba wa ai majaw, matsan masha ni hpe matsan dum myit grai rawng wu ai. Shi a asak (33) ning hta Jau tai wa nna, shaga la ai lam hte seng nna kasi kaja tai wa nu ai.

Madu a shaning 530 ning du ai shaloi gaw, Augusta Verumanduorum mare a Saradaw tai wa sai rai nga ai. Dai aten gaw, shi a Saradaw ginwang hpe Huns hte Vandals masha shazai ni e jahten ya, jam jau jaw hkrum ai aten mung rai nga ai. Raitimung, Saradaw Medard gaw, shi lu ai atsam hpe htam lahkawng n gun dat nna, yak hkak ai lapran hta shakut lai wa sai rai nga ai.

Madu a shaning 544 ning hta, Shi gaw, Fransik Hkawhkam Clotaire a hpaji jaw aya dang da ai hpe hkrum nu ai. Hkawhkam jan Redegondes gaw, San Pra ai Saradaw Medard a lata hta Hpung Magam gun amyu shayi buhpun sumraw hkam la nna, Deaconess aya hpe hkam la sai rai nga ai.

San Pra ai Medard gaw, Madu a shaning 545 ning hta Madu kaw yup pyaw ban sa mat wa sai rai nga ai. Shi n nga mat ai shaloi, Fransik mungdan ting yawng ngu na yawn shajang lai wa ma ai. San Pra ai Medard hpe Lup Makoi Mayang da ai Soissons mare na Lup ntsa e, Benedictine Tawra Jau Jawng langai hpe mung, gaw gap da sai rai nga ai.

San Pra ai Saradaw Medard n nga mat ai hpang, Nawku Hpung gaw, Shi hpe San Pra ai Masha dang dat let, Shi a Poi Nhtoi hpe mung, June shata (8) ya shani ngu masat shagrau dat ya sai rai nga ai.

Daini Nawku Hpung gaw, Newminster Mare na, San Pra ai Medard a Poi Nhtoi hpe galaw nga ga ai aten hta, anhte Hpung masha ni mung, Wa Saradaw Medard zawn, tinang makau grup yin hkan matsan mayan rai shanu nga ai ni hpe shawang tsawra myit kaba hte dang dep ai daram lakawn la lu hkra shakut sa wa nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)