San Pra ai Maximus a Poi Nhtoi (November 27) 27 November 2022

online image

San Pra ai Maximus a Poi Nhtoi (November 27)

San Pra ai Saradaw Miximus gaw, Fransik Mungdan, Provence mare kaw, lai wa sai A.D (300) ning htum wa mahka e, shangai chyinghkai wa ai rai nga ai. Shi gaw, asak kaba wa magang san seng san pra lam hta kasi majing grau tai wa magang rai nga ai. Shi a san seng san pra ai nga sat nga sa lam hte seng nna shiga ni chyam bra wa nhtawm, makau grup yin hkan na masha ni law law wa shi a jawng de sa wa ma ai.

Shi gaw, nnan daw hta e yu maya masha ni hte rau n dan n dawng ai sha tara shadik let nga lai wa ai. Dai hpang, Lerins mare na Jau Jawng kaw, lahkawng ngu na Jau Kaba lit magam hpe gun hpai lai wa sai.

Shi Jau Kaba lit magam gun hpai let yu gawn ai lahkawng ning laman jawng dai gaw grai rawt jat mat wa sai. Shi a kaba la ai lit magam hpe awng dang ai hte gun hpai lu na matu, yak hkak jam jau lam ni hpe hkam sharang let gun hpai lai wa sai rai nga ai. Jawng a rit kawp tara ni hpe ra n rawng hkra hkan sa shatup ai, mazut mazat re ai mun hte galaw da ai palawng hpe hpun rai nna magam gun lai wa sai rai nga ai.

Dai hpag Jau Miximus gaw, Riez mare na, Saradaw tai wa sai rai nga ai. A.D (439) ning hta galaw ai Riez Zuphpawng, A.D (441) ning hta galaw ai Orange Zuphpawng, hte A.D (454) ning hta galaw ai Aries Zuphpawng kaba ni hta e shi grai garum lai wa sai rai nga ai.

San Pra ai Saradaw Miximus gaw, A.D (461) Ning htum wa mahka November shata (27) ya shani, Madu kaw yup pyaw ban sa wa sai rai nga ai.

Saradaw Miximus n nga mat ai hpang, Nawku Hpung gaw, Shi hpe San Pra ai Masha dang dat let, Shi a Poi Nhtoi hpe mung, November shata (27) ya shani ngu, masat shagrau dat ya sai rai nga ai.

Daini Nawku Hpung gaw, San Pra ai Saradaw Miximus a Poi Nhtoi hpe galaw nga ga ai ten, Wa Saradaw Miximus gaw, shi a lit magam hpe sadi dung kang ka let, grai rawt jat awng dang hkra gun hpai lai wa sai hpe anhte hkaja la lu saga ai re. Dai majaw, anhte marai hkum shagu mung, Wa Saradaw Miximus zawn, gara shara kaw mi raitim, tinang ang ai lit magam hpe kang ka ai hte ngut kre hkan sa galaw chye ai ni byin tai nga ga law.

 

 

By;

Sister Rose Angeline Maran Nang Doi (SFX)

RVA-Kachin Service (Myitkyina)

Add new comment

2 + 2 =