San Pra ai Maximillian Kolbe a Poi Nhtoi (August 14) 14 August 2022

San Pra ai Maximillian Kolbe a Poi Nhtoi (August 14)

San Pra ai Maximillian Kolbe gaw, Poland mungdan kaw 1884 ning, January Shata (8) ya shani hta shangai chyinghkai wa ai rai nga ai. Shi ma kaji ten naw rai nga yang, Nu Maria, shi kaw dan pru nna, Nu Maria gaw shi lang taw ai nampan lahkawng kaw na lata shangun ai. Hpraw ai madaw gaw, san seng san pra ai kumhpa rai nhtawm, hkyeng ai gaw makam masham a majaw asak ap nawng kau ai a kumla rai nga ai. Maximillian Koble gaw: “Lahkawng ting ngai lata ai” ngu nna tsun ai.

Jau Kolbe gaw, Conventual Franciscan Jau Wuhpung kaw shang ai hpang, Karai Kasang hte seng ai Theology hpaji sharin shakre la na matu, Roma mare de sa mat wa ai. Jau tai na laning mi naw ra ai 1917 ning hta, shi gaw Militia of Mary Immaculate “Npawt Shut Hpyit Mara N Kap ai sha na-um nasin wa ai Nu Maria” a Wuhpung ngu ai Sasana magam gun wuhpung hpe de hpang da wu ai.

Dai hpang, 1927 ning hta Karakow mare kaw Tawra marai (800) lawm ai “City of Immaculate” Sasana Magam Gun Wuhpung hpe mung, gaw de da sai. Ndai Wuhpung shang malawng ni gaw laika dip shapraw ai kasa amu galaw ma ai. Shanhte dip sharaw ai “The Knights of Mary Immaculate” “Npawt Mara N Kap ai Nu Maria a Share Shagan Ni” mying ai magazine laika hpe copy sen kaba matut dip sharaw lai wa ma ai.

Jau Kolbe gaw, 1930 ning hta Japan mung de sa du nna, shaning loi na hkra sa nga nga ai laman “The Garden of Mary Immaculate Conception” mying ai Wuhpung hpe sa hpaw da ya sai. No (2) Mungkan majan aten hta shi gaw Yuda amyu sha hpyen yen ni a matu n hkrit n tsang ai sha amu galaw lai wa sai. Ndai lam hpe 1941 ning hta Hitler a mazut dik ai kaichyan “Gestapo” ni chye mat wa nna, Jau Kolbe hpe mying n kaja dik ai Auschwitz shara de sa kau ma ai.

1931 ning, July shata (31) ya shani htawng masha langai mi hprawng lawt mat ai majaw, marai (10) hpe kam ai hku lata la nna lusha n jaw sha ai sha kan si kyet mat hkra galaw ma ai. Shaloi Jau Kolbe gaw, dai marai (10) kaw lawm ai ma lahkawng a kawa, Francis Gajowniczek a malai shi si hkam na ngu wu ai. Dai majaw, Laban bat lahkawng lusha n jaw sha ai tawn da nna, August shata (14) shani San Pra ai Wa Jau Kolbe hpe Carbolic Acid hte tsi htu sat kau ma ai. Wa Jau Kolbe gaw, Nu Maria a mying gang let angwi apyaw sha nsa hti mat wa sai rai nga ai. 

Wa Jau Kolbe n nga mat ai hpang, 1971 ning, October shata (17) ya shani, Wa Sarabyin Pawlu (6) kaw nna, Shi hpe, A lu ai Masha hku nna masat dat sai rai nga ai.

1982 ning, October shata (10) ya shani, San Pra ai Wa Sarabyin Yawhan Pawlu (2) kaw nna, Shi hpe, San Pra ai Masha hku nna dang dat let, Shi a Poi Nhtoi hpe mung, August shata (14) shani ngu masat shagrau dat ya sai rai nga ai.

Daini Nawku hpung gaw, San Pra ai Wa Jau Maximillian Kolbe a Poi Nhtoi hpe galaw nga ai hte maren, anhte hpung masha ni mung, tinang a manaw manang a matu tau chye ai, matsan dum chye ai myit lu la na matu, San Pra ai Wa Jau Miximillian Kolbe hpang de lak san akyu hpyi la nga ga law.

 

By;

Sister Rose Angeline Maran Nang Doi (SFX)

RVA-Kachin Service (Myitkyina)

Add new comment

1 + 2 =