San Pra ai Mathilda a Poi Nhtoi (March 14)

San Pra ai Mathilda a Poi Nhtoi (March 14)

San Pra ai Mathilda gaw, Saxon ginwang up du kaba Theodoric a kasha jan rai nga ai. Ma kaji aten hta e, shi a kawoi dwi yu gawn ai Mama Jawng kaw nga kaba wa ai majaw, amu bungli galaw shaja ai myit, akyu hpyi shakut ai myit jasat, wenyi hte seng ai laili laika ni hti nna nga ai sat lawat hte nga kaba wa ai rai nga ai. Kanu yan Kawa lajang ya ai Henry of the Fowler hte mayu htinggaw de wu ai. Shi a madu wa Henry gaw katsa, (Mathilda a Kawa) si mat ai hpang shi a hkang galai tai wa ai. Dai hpang Germany mungdan kaw na hkawhkam bai tai wa nu ai.

Mathilda gaw, hkawhkam jan tai nna masha law law grau nna machyi makaw hkrum ai ni, dip lu di sha hkrum ai ni, machye machyang lam hta hpang hkrat nga ai ni, bawng masha ni hte mara galaw shut ai ni a ntsa e, hpu nau tsawra myit madun let, hkye mawai la wu ai. Dai zawn re ai masha ni hpe gawan katsan ai, sharin achyin ya ai, n gun jaw ga ni tsun ya ai, myit malai lu wa na matu lam madun matsun ya nna, shi a tsawra myit hpe madun dan ai. Hkawhkam Henry gaw, madu jan Mathilda ra sharawng ai lam ni yawng hpe grai n gun jaw ya ai. Shan a kun dinghku de ai (23) ning du ai shaloi, A.D (936) ning hta, Shi a Madu wa Hkawhkam Henry n nga mat wa sai rai nga ai. Dai aten kaw na, Mathilda gaw, hkawhkam hkaw seng hte seng ai dinghta ga a nga pyaw lam ni yawng hpe tawn kau da nu ai.

Shi a kasha ni marai (3) gaw cologne mare na, Saradaw Kaba tai wa ai San Pra ai Bruno mung lawm nga ai. Henry gaw, Bavaria ginwang up du tai wa nna, Otho mung, Germany Mungdan a hkawhkam kaba tai wa sai rai nga ai. Hkaw hkam Jan mau gup na hte seng ai Otho hte Henry yan nau kashun kashe rai mang hkang byin lai wa masai. Kanu Mathilda gaw, Otho hpe madaw Hkawhkam Jan Mau shagup ya ai majaw, jahtum e shan nau lahkawng ting e, Kanu hpe shaning law law zing ri shatsang nna, A.D (968) ning hta matsan mayan rai nna, N nga mat wa sai rai nga ai.

Mathilda, n nga mat ai hpang, Nawku Hpung gaw, shi hpe e, San Pra ai Masha dang dat let, Shi a Poi Nhtoi hpe mung, March shata (14) ya shani masat shagrau dat ya sai rai nga ai.

Daini Nawku Hpung gaw, San Pra ai Mathilda a Poi Nhtoi hpe galaw nga ga ai hte maren, anhte a prat hta mung, dinghta sut gan hta chyu n manoi nga ai sha, tinang a makau grup yin hkan nga ai, tinang garum shingtau la ra nga ai ni hpe dang lu ai daram garum shingtau lam woi matsun madun la lu hkra shakut sa wa ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)