San Pra ai Mary Sholedad a Poi Nhtoi (October 11)

San Pra ai Mary Soledad gaw, Spain Mungdan, Madrid mare kaw, lai wa sai 1826 ning, December shata praw (2) ya shani shangai wa ai rai nga ai. Shi a sak hkurng ten tup, matsan mayan re ai ni, machyi makaw hkrum ai ni hpe galaw daw nna nga lai wa sai. Ndai zawn rai matsan dum lama chye ai shi a myit masa ni a majaw, dingbai dingna jaw hkrum, mayak mahkak lam ni hkrum katut wa timung, awng dang ai hte tawt lai wa sai.

Karai Kasang kaw nna shi hkam la lu ai shaman chyeju atsam ni a majaw, Uropa Dan hte America Mungdan ni hta Mama Jawng (46) ting lu hpaw da ya nu ai. Dai hta n-ga, Machyi makaw hkrum ai ni hpe yu lajang na matu Mamgam Gun Wuhpung a Mama Kaba lit shatsam ya hkrum lai wa sai. Ndai zawn galu kaba rawt jat wa ai Magam Gun Wuhpung kata kaw mang hkang byin pru wa nna shada bra garan ai kaw du mat wa ma ai. San Pra ai Mary Soledad lawm ai magam na Mama ni hpe “Machyi ai ni hpe Yu Gawn ai Nu Maria a Nchyang Shayi Sha Wuhpung” (Handmaids of Mary Serving the Sick) nga nna shamying ma ai. Dai Wuhpung hpe 1861 ning hta Saradaw Ginwang kaw na madi shadaw ya let masat shagrin da ya sai.

San Pra ai Masha byin tai wa lu na matu, Shakut nga ai Mary Soledad gaw, dai Magam Gun Wuhpung a ningbaw lit hpe (35) ning tup gun hpai kau da ai. Shi a san seng san pra ai sat lawat hte machyi masha ni a ntsa tawn da ai matsan dum lam ai myit, ru yak jam jau lam ni hpe hkam sharang ai myit jasat ni hpe mu nna, “Maria a Nchyang Shayi Sha Magam Gun Mama Wuhpung” de numsha ni law law shang lawm wa ma ai.

Mary Soledad gaw, Domican Mama Magam Gun Wuhpung de shang na matu shawng hpyi shawn ai. Raitimung, Shi a hkamja lam nau n kaja ai majaw, n hkap la ma ai. Shi myit ai hku n byin lu timung, Shi a sak hkrung ten tup, matsan mayan re ai ni hpe galaw wdaw nna mungdan ntsa kaw (61) ning tup Karai Kasang a shangun ma tai nna amu gun hpai kau da sai.

“Maria a Nchyang Shayi Sha Mama ni” gaw, 1865 ning hta Spain Mungdan a mare daju, Madrid kaw, laja lana byin lai wa ai Cholera machyi makaw kaba aten hta, alak mi rai kam shamyet lu nna, shakawn shagrau hkrum lai wa ma ai. Mama ni a magrau grang ai sat lasat hte machyi masha ni a ntsa tawn da ai hpu nau tsawra myit kaba a majaw, shayi sha ni law law dai wuhpung kaw na Mama ni byin tai wa masai.

San Pra ai Mary Soledad gaw, 1887 ning, October shata (11) ya shani, Madu hta yup pyaw ban sa wa sai rai nga ai.

San Pra ai Mary Soledad n nga mat ai hpang, 1950 ning, February shata (5) ya shani hta, dai aten na, Wa Sarabyin Pius (XII) kawn Shi hpe A Lu ai masha masat shagrau dat sai rai nga ai.

Dai hpang, 1970 ning, January shata (25) ya shani, dai aten na Wa Sarabyin Pawlu (VI) kawn Shi hpe San Pra ai Masha dang dat let, Shi a Poi Nhtoi hpe mung, October shata (11) ya shani masat shagrau dat ya sai rai nga ai.

Daini Nawku hpung gaw, San Pra ai Mary Soledad a Poi Nhtoi galaw nga ai hte maren, anhte a makau grup yin hkan na matsan mayan re ai ni hpe tinang dang lu ai atsam hte garum pawn ba la lu hkra shakut nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)