San Pra ai Mary Di Rosa a Poi Nhtoi  (December 15) 15 December 2022

San Pra ai Mary Di Rosa a Poi Nhtoi  (December 15)

San Pra ai Mary Di Rosa gaw, lai wa sai 1813 ning, November shata (6) ya shani, Italy Mungdan, Brescia mare kaw shangai chyinghkai wa ai rai nga ai. Shi gaw, (42) ning tup akyu hpyi shaja ai hte shawa hpe galaw dau jau ai bungli galaw lai wa sai.

Shi gaw, Kanu n nga mat ai hpang, kun dinghku n de ai sha Mama ni zawn, kawa a mam htu jak rung kaw bungli galaw ai numsha ni a wenyi lam woi tai ya lai wa sai. Shi lu da ai aten ni hpe, Wudang ntsa Madu Yesu a nni nkri hkam nna si hkam ai lam hpe myit sumru akyu hpyi nna akyu jashawn lai wa nu ai.

1836 ning hta, Brescia mare ting machyi makaw kaba hkrum wa ai shaloi, dai mare na tsirung kaw mung n hkring n sa, pu ba lam n nga ai sha garum shing tau lai wa sai rai nga ai.

San Pra ai Mary Di Rosa gaw, Numsha ni a matu hte Ma-a ni a matu jawng langai mi hpaw da ya wu ai. Machyi ai ni hpe yu lajang ya ai, (Handmaids of Charity of Brescia) ngu ai “Brescia mare na Matsan Dum Lama Amyu Shayi Ni” mying ai wuhpung hpe mung woi awn let sak hkrung lai wa sai.

Shi gaw, 1855 ning, December (15) ya shani, shi a asak (42) ning hta e, Madu kaw yup pyaw ban sa mat wa sai rai nga ai.

Shi n nga mat wa ai hpang, 1940 ning, May shata (26) ya shani, dai aten na Wa Sarabyin Pius (12) kawn, Shi hpe A-lu ai Masha ngu shagrau dat ya sai rai nga ai.

Dai hpang 1954 ning, June shata (12) ya shani, Wa Sarabyin Pius (12) sha, shi hpe San Pra ai Masha dang dat let, Shi a Poi Nhtoi hpe mung, December shata (15) ya shani ngu masat dat ya sai rai nga ai.

Daini, Nawku hpung gaw, San Pra ai Mary Di Rosa a Poi Nhtoi hpe galaw nga ai aten hta, anhte a sak hkrung hkawm sa lam ni hta mung, San Pra ai Mary Di Rosa zawn, Madu Yesu a nni nkri hkam la lai wa sai lam ni hpe myit dum sumru let, shi madu hte rau hkawm sa lu hkra shakut sa wa ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)

#RVA_Kachin_Service

#Feastday_December15

#St_Mary_Di_Rosa