San Pra ai Martin (I) a Poi Nhtoi (April 13) 13 April 2023

San Pra ai Martin (I) a Poi Nhtoi (April 13)

San Pra ai Martin (I) gaw, Sabyin ni kaw nah pang jahtum tara a majaw, sat kau hkrum lai wa ai Sarabyin rai nga ai. Shi gaw, Italy Mungdan, Todi mare kaw, A.D (598) ning, June shata (21) ya shani, daidaw shangai chyinghkai wa ai rai nga ai.

Shi a hpaji machye machyang hte san seng san pra ai myit jasat ni a majaw, A.D 649 ning hta Sarabyin lit shatsam ya ai hkrum nu ai. Shi Sarabyin tai wa ai shaning hta nan, Lateran Zuphpawng Kaba Hpe woi galaw ai. Ndai Lateran Zup Hpawng kaw, Monothelitism masa hpe ninghkap kau lu sai. Monothelitism masa ngu ai gaw, “Madu Yesu gaw, Karai Kasang myit jasat sha lu ai.” nga nna shaut shai ai hku nna sharin ya ai masa rai nga ai. Raitimung, Sarabyin Martin (I) gaw, dai zup hpawng kaw nna, “Madu Yesu gaw, Karai myit hte Shing gyim masha myit” lahkawng yan rawng ai ngu nna madi shadaw sharin ya sai rai nga ai. Lama na, dai lam hpe n kam ai ni rai jang, Nawku Hpung kawn n hkap la mat ai.

Sinpraw dan na Hkawhkam Constant (II) gaw, lahta na, shut shai ai masa hpe madi shadaw ai. Dai majaw, shi gaw, Sarabyin hpe makam masham hte seng ai ginjaw Constantinople mare de rim mat wa nu ai. Sarabyin hpe makam masham hte seng nna sadi n dung ai wa ngu mara shagun let, dingda Russia Mungdan, Crimea ginwang, Kherson shara de gawt shapraw kau wu ai.

Sarabyin Martin (I) ka da ai laika hta, “Ngai gaw, (47) ya tup, hka katsi hte pyi man myit hka shin na ahkang n lu ai. Nye a jinghku jingyu ni hte manaw manang ni yawng gaw, ngai hpe malap kau manu ai. Madu ngai hpe yu gawn nga na re; ngai hpe ndai zawn rai nna aten galu galaw tawn na n rai nga ai.” nga nna ka da ai nga ai.

San Pra ai Martin (I) gaw, A.D (655) ning, September shata (16) ya shani  hta Kherson mare kaw, Madu hta yup pyaw ban sa mat wa sai rai nga ai. Daini na aten du hkra, Sarabyin ni kaw na, makam masham a majaw sat kau hkrum lai wa ai hpang jahtum Sarabyin hku nna, shi hpe shakawn shagrau nga ai re.

Sarabyin Martin (I), n nga mat ai hpang, Nawku Hpung gaw, shi hpe San Pra ai masha dang dat let, shi a Poi Nhtoi hpe mung, April shata (13) ya shani ngu masat shagrau dat ya sai rai nga ai.

Daini, Nawku hpung gaw, San Pra ai Wa Sarabyin Martin (I) a Poi Nhtoi hpe galaw nga ai aten hta, anhte hta ra nga ai shaman chyeju ni, Karai Kasang Wa jaw ya rit ga matu, lak san akyu hpyi la nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)