San Pra ai Martin de Porres a Poi Nhtoi (November 3) 03 November 2023

San Pra ai Martin de Porres a Poi Nhtoi (November 3)

San Pra ai Martin de Porres gaw, lai wa sai 1579 ning, December shata (9) ya shani hta, Peru Mugndan, Lima mare kaw shangai chyinghkai wa ai rai nga ai. Shi hpe “Dingman ai tara hte seng nna kamhpa lu ai masha” nga nna masat da nga ai. Shi a Kawa gaw, Spain Mugndan na shan hpraw amyu share shagan langai mi rai nga ai raitim, kasha Martin gaw, shan chyang ai majaw kawa gaw kasha hpe yu n lu nna kanu hte hkrai kabai tawn da hkrum lai wa sai.

Martin, shi a asak (15) ning du ai shaloi, Lima Mare kaw na Dominican Sasana Wuhpung na Brother langai tai wa sai. Shi a prat tup dai mare kaw sha sak hkrung nga lai wa sai rai nga ai.

Brother Martin hpe, galaw shangun ai amu ni gaw n dan n dawng, yu maya amu ni, kara zen ai, buhpun palawng hkrut ai, tsi tsi ai zawn re ai amu kaji ni rai nga ai. Raitimung, Shi gaw, dai amu ni hpe kabu gara rai hkan galaw ai.

Bai nna, matsan masha ni hpe lusha gam garan jaw ai, garum madi shadaw ya ai amu ni mung galaw lai wa sai rai nga ai. Chyahkrai ma ni a matu, nta hte tsi-rung langai mi gap ya ai. Shi hte rau nga ai Saradaw ni, Jau ni a wenyi hte seng ai yak hkak mang hkang lam ni, dingbai dingna jaw ai lam ni hpe lu hparan ya ai chyeju atsam shi lu wu ai.

San Pra ai Martin a shawang tsawra myit gaw, nam dusat dumyeng ni kaw mung du ai. Lanyau ni hte Gwi ni a matu nga shara galaw ya ai. Yu kasha ni hpe mung sha na lusha tam jaw ai. Shi a makam masham myit kaba ai majaw, machyi masha ni hpe shamai shatsai ya lu ai shaman chyeju, hpat wat kaw mung nga dan lu ai, shara kaga ga kaw aten mi hta sha paw pru dan lu ai shaman chyeju atsam ni shi lu la ai.

Ndai zawn rai nna, Brother Martin gaw, shagrit shanem let, n dan n leng ai magam bungli ni galaw shakut let, Karai Kasang Wa a magam hpe gun nga ai aten, 1639 ning, November shata praw (3) ya shani hta, Madu Yesu kaw yup pyaw ban sa mat wa sai rai nga ai.

Shi n nga mat ai hpang, 1837 ning hta, dai aten na Wa Sarabyin Gregory (16) kawn, shi hpe A Lu ai Masha ngu masat shagrau dat sai rai nga ai.

Dai hpang, 1962 ning, May shata (6) ya shani hta gaw, dai aten na Wa Sarabyin Yawhan (23) kawn, shi hpe San Pra ai Masha dang dat let, Shi Paoi Nhtoi hpe mug, November shata praw (3) ya shani ngu nna masat shagrau dat sai rai nga ai.

Daini Nawku Hpung gaw, San Pra ai Brother Martin de Porres a Poi Nhtoi hpe galaw nga ga ai aten, anhte a prat hta mung, kaning re ai magam bungli mi raitim, Karai Kasang Wa kaw ap da let, shagrit shanem ai hte galaw shakut ai rai yang, hpang jahtum na nhtoi hta teng sha shagrau la ai hkum na re hpe myit dum let, ta tut sak hkrung lam hta hkansa shatup lu hkra shakut nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)