San Pra ai Martha (July 29)

San Pra ai Martha gaw, Maria Magdalena hte Lazaru yan nau a kanau rai nga ai. Shanau ni gaw, Yeruslem mare makau na, Betani mying ai kahtawng kaw shanu nga lai wa masai. Shanau ni hpe Madu Yesu grai tsawra ai, grai lang sa gawan lai wa sai. Kalang mi na, Yesu hpe daw sha na matu amu kyin taw ai Martha gaw, Kana Maria Magdalena gaw, Yesu a shatsam ai ga hpe madat nga nna shi hpe n garum ai majaw aput angun ga tsun hkrup ai. Shaloi Madu Yesu gaw, “Marhta, Martha, Nang gaw lam law law a matu myit pu nga ndai. Ahkyak ai gaw langai sha re. Grau kaja ai hpe Maria lata la nu ai; shi kaw nna bai la lu na n rai.” (Luka 10:42) nga nna tsun shadum wu ai.

Lazaru grai machyi sawng nga ai majaw, shan nau gaw Madu Yesu hpe shaga dat ma ai. Rai timung, Madu Yesu gaw Lazaru si ai hpang mali ya du ai shaloi she shan nau a nta de du sa wa lu ai. Shaloi Martha gaw, Madu Yesu hpe “Nang ndai kaw she nga nga yang kanau Lazaru si na n re” nga na hkap tsun ai. Shaloi Madu gaw; “Ngai gaw bai hkrung raw tai lam hte asak rai nga n ngai. Ngai hpe kam ai wa gaw si mat timung bai hkrung rawt wa na” nga nna bai htan ya wu ai. Dai hpang Madu Yesu gaw, Lazaru a lupwa de sa nhtawm, “Lazaru e, rawt wa nu” ngu tsun ai, shaloi jang si ai wa asak bai hkrung wa ai. (Yawhan 11:1-44)

Bungli kin la ai dinghku num ni a kumla ajet tai ai Martha hpe “Shat shadu ai ni a laksan kam shamyet lu ai jan, Patroness of Cooks” ngu nna masat shagrau hkrum lai wa sai.

Dai majaw, anhte Nawku hpung kaw nna, shaning shagu July shata (29) ya shani hpe, San Pra ai Martha a Poi Nhtoi hpe ding yang ngu na galaw nga ga ai. San Pra ai Martha hpe Madu shadum lai wa ai zawn, anhte a prat hta mung, bungli kade mi kyin taw ai raitim, Madu hpe aten jaw lu hkra shakut sa wa nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)