San Pra ai Maria Magdalene @ Madalen a Poi Nhtoi (July 22) 22 July 2023

San Pra ai Maria Magdalene @ Madalen a Poi Nhtoi (July 22)

Maria Madalena gaw, Mahta hte Lazaru a kana rai nna, mara kata nga lai wa let, nat sanit shang hkrum ai amyu shayi sha mung rai nga ai. (Lk 8:2)

Shi gaw, Yuda Mung, Betani Kahtawng na rai nga ai. Shut hpyit mara galaw ai prat kaw nna galai shai wa ai hpang, Galile mung, Magdala kahtawng kaw nga ai majaw, Magdalene (Madalena) ngu mying hkawt lu mat ai rai nga ai.

Lani mi hta Simun mying ai Hparishe a nta kaw Madu Yesu lusha sha nga yang, Madalena gaw sa wa nhtawm, Madu a lagaw ni hpe myiprwi si hte kashin ya ai hpang manam pyaw ai sau hte chya ya ai. Dai hpe Simun mu nna, myit yu kataw nga ai. Shaloi Madu Yesu gaw, “Shi a tsawra myit kaba la nga ai majaw, shi a mara law law hpe raw shatsai kau hkrum sai.” (Luka 7:47) nga nna tsun ai.

Dai shani kaw nna, Madalena gaw, Madu a kasa ni a hpang hkan ai kaga amyu shayi ni hte rau kasa ni hpe ra mara galaw jaw ya sai. Lani mi hta Yeu gaw, Betani kahtawng kaw na Lazaru a nta de sa du ai; shaloi Martha gaw, kana Madalena shi hpe garum n jaw ai sha Yesu a makau kaw Madu a matsun ga ni hpe madat nga ai majaw aput angun ga tsun ai. Shaloi Yesu gaw, “Martha e, nang gaw lam amyu shagu a matu myit tsang nga ndai; ahkyak ai lam langai sha rai nga ail Maria Madalena gaw, grau hkyak ai hpe madaw lata la nu ai; dai shi kaw nna bai n la kau ya lu na re.” (Luka 10: 41-42) nga nna tsun da nga ai.

Madu Yesu nni nkri yubak hkam na shawng kru ya naw ra yang, Madu gaw, Betani kahtawng na Lazaru a nta de bai sa du ai. Shaloi Madalena gaw, grai manam pyaw ai sau ni hte Madu a lagaw hpe kashin ya ai. Dai hpe Yuda Isakarut mu ai shaloi, dai daram manu dan ai hpe lahpawt lama di nga ai; dai hpe dut nna matsan masha ni hpe gam jaw kau yang grau mai na ngu tsun ai. Shaloi Madu Yesu gaw, “Ngai hpe makoi mayang ai aten du hkra ndai hpe shi kyem tawn da nu ga. Matsan masha gaw, nanhte hte galoi mung nga ai; ngai chyawm gaw, nanhte hte tut tut nga nga na n rai.” nga nna bai htan ya ai. (Yahawn 12: 7-8)

San Pra ai Maria Madalena n nga mat ai hpang, Nawku hpung kaw nna, Shi a Poi Nhtoi hpe shaning shagu July (22) ya shani galaw ya nga ai rai nga ai.

Daini Nawku Hpung gaw, San Pra ai Maria Madalena a Poi Nhtoi hpe galaw nga ai aten hta, anhte mung, shing gyim masha rai nga ga ai majaw, kalang lang shut kataw wa ai aten ni hta myit ru myit tsang taw nga na malai, San Pra ai Maria Madalena zawn, Madu hpang de bai nhtang gayin wa lu ai ni byin tai lu hkra shakut sa wa ga law. 

By;

Sister Rose Angeline Maran Nang Doi (SFX)

RVA-Kachin Service (Myitkyina)