San Pra ai Maria Goretti a Poi Nhtoi (July 6)

San Pra ai Maria Goretti gaw, “Ramma ni Laklai Kam Hpa Shamyet ai San Pra ai Sahyi sha” rai nga ai. Shi gaw, Italy Mungdan, Nettuno mare na, Yi sun galaw sha ai htinggawn kaw nna 1890 ning, October shata (16) ya shani hta shangai chyinghkai wa ai rai nga ai. Maria Goretti (9) ning sha naw rai yang, kawa gaw hkali ana hte nnga mat wa sai. Shi a Kanu gaw, sun kaw amu galaw ai ten hta shi gaw, kanau ni hpe nta kaw woi nga nna nta bungli hpe galaw ai.
1902 ning, July shata (5) ya shani hta, nta makau na asak (18) ning re ai Alexander mying ai la kasha gaw, Maria Goretti shi hkrai sha nna kaw nga nga ai hpe mu nna mara galaw na matu gyam wu ai. Dai hpe Maria Goretti aja awa ning hkap let, “Dai gaw Mara re: Karai Kasang Kasang dai hpe n ra ai” (No, it’s sin. God does not want it) nga nna ning hkap tsun ai. Alexander gaw, Goretti a buhpun palawng ni hpe gang raw ai. Goretti gaw, dai zawn mara galaw na malai si hkam na, nga nna tsun ai. Goretti a ga hpe na nna, Alexander gaw, grai pawt gaya mat ai majaw, Goretti a shingma hpe nhkyi hte galun kau da nhtawm hprawng mat wa ai.
Goretti hpe tsirung de mawdaw hte htaw sa wa timung, Goretti asak n lu hkye la mat ai. Ndai mabyin byin ai hpang nari hkying hkum (24) na ai shaloi, Goretti gaw, asak (12) ning hta “Masha sat ai wa hpe mara raw ya ai.” nga kahte nsen hte tsun kau da let, July shata (6) ya shani hta nsa hti mat wa sai rai nga ai.
Alexander gaw, shi galaw ai mara a majaw, myit n malai ai sha, shaning (30) ning tup nga nga ai. Lani mi hta San Pra ai Maria Goretti shi hpe nampan sa jaw ai shingran hpe mu ai. Dai shaloi, shi myit malai lu nna Goretti a kanu kaw mara raw hkyamsa jaw ya na matu, sa hpyi nem wu ai.
San Pra ai Anthony Zaccaria n nga mat ai hpang, 1947 ning, April shata (27) ya shani dai aten na Wa Sarabyin Pius (XII) kawn, Shi hpe A Lu ai masha masat shagrau dat ya sai rai nga ai.
Dai hpang 1950 ning gaw, Shi hpe e, Wa Sarabyin Pisu (XII) sha, San Pra ai masha dang dat let, Shi a Poi Nhtoi hpe mung, July shata (6) ya shani masat shagrau dat ya sai rai nga ai. Dai shagrau poi hta Goretti a kanu mung sa du shang lawm ai lam labau hta ka da nga ai. Dai shani gaw, Nawku Hpung a matu, lachyum rawng dik hte manu dan la ai nhtoi tai wa sai. San Pra ai Maria Goretti akyu hpyi ya ai a marang e, lamik kumla law law byin wa ai; dai mabyin ni hta Alexander myit malai lu wa ai lam gaw, kaba dik htum ai lam rai nga sai.

Dai hpang, 1897 ning, May shata (27) ya shani hta gaw, Wa Sarabyin Leo (XIII) sha, Shi hpe San Pra ai masha dang dat nna, Shi a Poi Nhtoi hpe mung, July shata (5) ya shani masat shagrau dat ya sai rai nga ai.

By;
Sister Rose Angeline Maran Nang Doi (SFX)
RVA-Kachin Service (Myitkyina)