San Pra ai Maria Dodenica Mazzarello a Poi Nhtoi (May 13) 13 May 2023

San Pra ai Maria Dodenica Mazzarello a Poi Nhtoi (May 13)

San Pra ai Maria Dodenica Mazzarello gaw, “Hkristan ni a Ningrum Ningtau Nu Maria a Shayi Sha” (Institue of the Daughters of Mary Help of Christians) mying ai Mama Magam Gun Wuhpung hpe gaw de hpang ai malawm (Co-Founder) rai nga ai. Shi gaw, Italy Mungdan, Alsessandria ginwang Mornese mare hta e, 1837 ning, May Shata (9) ya shani shangai chyinghkai wa ai rai nga ai. Shi gaw, bungli galaw shaja ai kanu yan kawa kaw na shangai chyinghkai wa ai rai nna, shannau ni marai (7) nga let, kaba htum rai nga ai. Kanu yan Kawa gaw, grai dingman nna makam masham grain gang kang ai Hkristan Hpung masha ni rai ma ai.

Shi a hkawnsek prat hpe asak (15) ning kaw nna, Karai Kasang kaw nag a sadi jaw let ap kau wu ai. Dai hpang, shi gaw Npawt Mara N kap ai Nu Maria a Shayi Sha Mama Wuhpung (Association of the Daughters of Mary Immaculate) de shang mat wa ai. Shi gaw, matsan dum lam ai magam bungli hte kasa amu ni hpe madung tawn nna shakut gun hpai lai wa sai rai nga ai. Dai myit jasat lahkawng rawng ai majaw, “bungli galaw mayu ai myit rawng wa ai majaw, “Hkristan ni a Ningrum Ningtau Nu Maria a Shayi Sha Mama Wuhpung” (Institue of the Daughters of Mary Help of Christians) byin pru wa sai rai nga ai.

Bai 1864 ning hta, Numsha ma ni a matu amu galaw nga ai, San Pra ai Don Bosco hte hkrum shaga lai wa yu sai rai nga ai. 1872 ning hta gaw, Maria Domenic, Mama tai Ga Sadi tawn lai wa sai. Dai hpang Mama kaba lit shatsam ya ai hkrum nu ai. Shi a kanu langai mi zawn re ai myit jasat hte kaja ai ningbaw ningla kasi a majaw, masha law law shi hte rau rai mat wa nna, Karai Kasang a mungga shabra ya lai wa masai.

San Pra ai Maria Domenica gaw, Mama Wuhpung a Asti mare kaw na ginjaw nta rai nga ai, Nizza Monferrat kaw, 1881 ning, May shata (14) ya shani, shi a asak (44) ning hta e, Madu kaw yup pyaw ban sa mat wa sai rai nga ai.

Shi n nga mat ai hpang, 1938 ning, November shata (20) ya shani hta, dai aten na, Wa Sarabyin Pius (11) kawn shi hpe A lu ai masha masat shagrau dat ya sai rai nga ai.

Dai hpang, 1951 ning, June shata (24) ya shani hta, dai aten na, Wa Sarabyin Pius (12) kawn, shi hpe San Pra ai masha dang dat let, shi a Poi Nhtoi hpe mung, May shata (13) shani masat shagrau dat ya sai rai nga ai.

Daini Nawku Hpung gaw, San Pra ai Maria Dodenica Mazzarello a Poi Nhtoi hpe galaw nga ga ai aten hta, anhte marai hkum shagu hpe, Karai Kasang Wa galaw shangun nga ai mai kaja ai lam ni hpe myit sawn sumru yu nna, ta tut hkan galaw shakut lu na tsam jaw ya rit ga matu, akyu hpyi nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)