San Pra ai Margret Bourgeoys a Poi Nhtoi (January 12)

Saint Margret Bourgeoys (January 12)

San Pra ai Margret Bourgeoys gaw, Canada Mungdan na shawng ningnan na San Pra ai Masha Jahpan hte Shagrau Masat hkrum ai amyu shayi rai nga ai. Shi gaw, Fransik Mungdan, Troyes Mare kaw e, lai wa sai 1620 ning, April shata (17) ya shani shangai chyinghkai wa ai rai nga ai.

1652 ning hta shi gaw, Ma kaji ni a matu laika sharin jawng  langai mi shawng hpaw da ya nu ai. Bai nna, Nortre Dame Mama Magam Gun Wuhpung (Congregation of Notre Dame) hpe mung, 1617 ning hta hpaw hpang dat ya sai.

Margret Bourgeoys gaw, shi a asak (20) ning du ai shaloi, Karai Kasang a  laksan magam gun na matu shaga la hkrum nu ai. Shi gaw, shi a daidaw buga rai nga ai Troyes mare na Mama Jawng de shang mat wa nu ai. Dai Mama Wuhpung ni gaw, mare ting kaw na matsan mayan re ai ma kaji ni hpe laika hpaji sharin ya ai hte shawa masha ni a matu tinang a asak hte aten hpe madung tawn nna ap nawng bungli galaw ai Magam Gun Hkawnsek ni rai nga ma ai.

Canada Mungdan, Montreal ginwang up du hkum nan saw shaga la ai majaw, Margret Bourgeoys gaw, Canada Mungdan de htawt sa mat wa ai. Shi gaw, Montreal Mare kaw nga shajang ai Fransik hpyen dap kaw na Fransik ma ni hpe laika hpaji ya ai lit shatsam ya ai hpe hkrum nu ai. 1657 ning hta ma ni a matu, shawng nnan na laika sharin jawng hpe gawgap ya sai. Dai Colony kaw nga ai Fransik amyu shayi ni hpe kajai ai kun dinghku de lu na matu, sharin ya let yu lakawn ai lit hpe hkap la wu ai.

Ndai zawn rai nna, San Pra ai Margret a laika sharin jawng ni, shawa hte seng ai magam bungli galaw na shara ni gaw gap ya ai shiga gaw, Canada Mungdan kaw chyam bra wa nu ai. Dai zawn shi gaw, Wenyi hte seng nna alak mi rai atsam rawng ai majaw, San Pra ai Margret hpe Kolony Ginwang a Kanu “Mother of Colony” nga nna shagrau shamying ya ma ai.

San Pra ai Margret gaw, 1671 ning hta, Notre Dame Mama Magam Gun Wuhpung (Congregation of Notre Dame) hpe de da ya lai wa sai. Dai Wuhpung kaw shang lawm ai ni gaw, akyu hpyi shaja ai, ruyak jam jau hte matsan mayan re ai hpe hkam sharang ai, shawa akyu a matu tinang hkum hpe ap nawng ai myit jasat hte sak hkrung ai amyu shayi sha ni rai ma ai.

Shi shawng ningnan hpaw hpang da tai Mama Wuhpung ndai hpe Hkawhkam Louis (XIV) hkum nan madi shadaw tawn ai Shawa Bungli hte Seng ai Madi Shadaw Hkrang “Civil Charter” hte shagrau hkrum ai sha n-ga, Canada Mungdan, Quebec mare kaw na Saradaw Kaba Laval hku nna mung, Nawku Hpung a tara shang “Magam Gun Wuhpung” ngu nna 1676 ning hta Canonical Approval ngu ai Nawku Hpung madi shadaw masat shagrin let, Shagrau ya ai hkrum nu ai.

Dai hta n-ga, Shi a Mama Wuhpung gaw, tara shang hkansa tara hkrang madung hte ra ai “Approbation of the Religious Constitutions” hpe Nawku Hpung kaw nna madi shadaw masat shagrin ya ai lam hpe 1690 ning hta lu la sai, Magam Gun Wuhpung mung rai nga ai. Dai zawn rai nna, Shanhte a Magam Gun Wuhpung ni a Shiga gaw, kaga mungdan law law de mung chyam bra mat wa masai.

 San Pra ai Margret  gaw, dai zawn rai Sasana Magam bungli hte Shawa a matu grai shakut shaja lai wa ai hpang, 1700 ning, January shata (12) ya shani gaw, Madu hta yup pyaw ban sa wa sai rai nga ai.   

San Pra ai Margret n nga mat ai hpang, 1950 ning, November shata (12) ya shani hta, dai aten na Wa Sarabyin Pius (XII) kawn, Shi hpe A Lu ai Masha hku nna masat shagrau dat ya sai rai nga ai.

Dai hpang, 1982 ning, October shata (31) ya shani hta gaw, dai aten na Wa Sarabyin Yawhan Pawlu (II) kawn, Shi hpa San Pra ai Masha dang dat let, Shi a Poi Nhtoi hpe mung, January shata (12) ya shani ngu masat shagrau dat ya sai rai nga ai.

 

By; Sister Rose Angeline Maran Nang Doi (SFX)

RVA-Kachin Service (Myitkina)

Add new comment

1 + 3 =