San Pra ai Margaret Mary Alacoque a Poi Nhtoi (October 16)

San Pra ai Margaret gaw France (Pin-tit) mungdan kaw Madu a shaning 1647 ning, July (22) ya shani hta shangai dai daw lai wa sai. San Pra ai Margaret gaw, moi naw kaji nga ai ten kawn nna, mara hpe grai ndawng n-yawt koi kau ai hte, akyang lai len grai kaja ai numsha ma rai nga ai. Shi a hkum hkrang myit masin hpe galoi mung san seng ai hku nna nga mayu ai jan mung re. Dai majaw, kaji ten shi a asak (12) ning ten kaw nna, jahpawt shagu hkying (4:00 am) hta rawt nna, akyu hpyi ai lam chye lu ai. Bat mi hta nlaw htum (3) lang lusha gam ai hte, mu sau ai shat mai ni hpe n sha ai sha, matsan mayan re ai matsan ma ni hpe gam garan jaw jaw re ai lam labau hta matsing da ma ai. Ya na zawn matsan ma ni hpe garan jaw ai magam bungli gaw shi grai myit lawm ai magam langai mi mung rai nga ai. Dai zawn gam jaw garan jaw ai lam hta grai myit pyaw ai, nga nna, mung tsun chye nga ai.
San Pra ai Margaret gaw, shi a prat hpe Madu Karai Kasang hpe ap jaw mayu ai majaw, kaji ten kawn mama tai mayu ai myit ni rawng nga nu ai. Shi a sak prat ram wa sai hte rau, Mama tai jawng de shang nna, shakut hpang wa nu ai. Shingrai (1672) ning hta Mama tai wa sai rai nga ai. Masha ni zawn machye machyang hpaji lam hta grai ning tawn ai lam n nga ai rai tim, shagrit shanem ai myit gaw, masha hta lai jan hkra nga ai lam chye lu ai. Dai majaw, San Pra ai Margaret gaw, shi a prat tup hta shagrit shanem ai myit hte, Madu Yesu a man e, “Ngai n ging n dan n ngai,” nga nna, hkam la chye nga ai re.
Mama kaba ni shi hpe n-gawn n-sawn di ai hpe mung, hkam sharang let, mani sumsai myi man hte mara n mu hkap la lai wa sai rai nga ai. Bai nna, myit ru myit tsang lam shagu hta mung, kabu sharawng nga nu ai. San Pra ai Margaret Mary gaw, Madu Yesu shi hpe grai tsawra ai ngu hkam sha lu ai re majaw, aten lu shagu Chyoi Pra hkum de sa nna, Madu Yesu hte sa shaga ga rai, n gun la nga nu ai. Madu Yesu mung shi hpe grai tsawra ai hte madu a shaning (1674) ning kawn (1675) ning lapran e, Margaret Mary hpe dan pru dan nhtawm, shi a Salum ningsang hpe tsawra hkungga na lam tsun dan sai. Ndai zawn rai, lani mi na ten hta, Chyoi Pra ai hkum a man e, akyu hpyi nga ai shaloi, San Pra ai Margaret Mary gaw, Yesu hpe mu sai hta n ga, Madu Yesu a sinda hta tsawra ai wan hte grung nga ai Karai Yesu a Salum Ningsang hpe mu mada lu nu ai.
Madu Yesu, shi a salum ningsang hpe madun dan let, masha ni law law wa, mara galaw nna, Karai Kasang hpe n gawn n sawn di nga ma ai. Dai majaw, Karai Kasang hpe grau nna, tsawra lu mu ga, Yesu a Salum ningsang hpe hkungga na lam Yesu tsun ai hpe Maragaret na la lu nu ai. Dai shani kawn nna, Margaret gaw, shi a myit hta, Madu Yesu a salum ningsang hpe grau grau tsawra hkungga nga nu ai. Bai, shinggyim masha ni shut hpyit mara hta na lawt lu na matu mung, mai byin ai made, hkaw tsun n gun jaw nga nu ai.
San Pra ai Margaret Mary, shi hkum nan mung, Yesu a Salum hpe sharawng awng ai hte hkungga shakawn na lam, seng ang ai Saradaw ni, Mama Kaba ni hpe tsun dan sai. Shingrai, lahta de na ahkaw ahkang lu sai hte rau, San Pra ai Margaret Mary gaw, Madu Yesu a Salum Ningsang hta pyaw nga sai rai nga ai. Shi a matu Madu Yesu shanu nga ai Chyoi Pra hkum htingnu gaw, pyaw len shara, hkring sa shara tai nga sai rai nga ai.
Ndai zawn rai nna, Nawku hpung a magam hta shakut shaja nga ai aten, San Pra ai Margaret Mary gaw, Madu a shaning (1690) ning, October shata (17) ya shani, shi a asak (43) ning hta Madu kaw yup pyaw ban sa wa sai rai nga ai.
San Pra ai Margaret Mary n nga mat ai hpang, 1864 ning, September shata (18) ya shani, dai aten na Wa Sarabyin Pius (IX) kawn Shi hpe A lu ai masha hku nna masat shagrau dat ya sai.
Dai hpang 1920 ning, May shata (13) ya shani, Wa Sarabyin Benedict (XV) kawn, San Pra ai Margret hpe, San Pra ai masha dang dat nna, Shi a Poi Nhtoi hpe mung, October shata (16) ya shani masat shagrau dat sai rai nga ai.
Daini Nawku hpung kawn, San Pra ai Margaret Mary Alacoque a Poi Nhtoi hpe galaw nga ga ai hte maren, anhte a san prat hkrun lam hta mung, shagrit shanem ai myit hte Madu Yesu hpe grau nna tsawra hkungga manu shadan lu hkra shakut ga, lak san akyu hpyi la nga ga law.

By;
Sister Rose Angeline Maran Nang Doi (SFX)
RVA-Kachin Service (RVA-Kachin Service)