San Pra ai Marcellinus hte Petru Yan a Poi Nhtoi (June 2)

San Pra ai Marcellinus gaw, Roma mare kaw na myit kaba ai Jau langai mi rai nga ai. San Pra ai Petru gaw, nat hkyawt atsam rawng ai wa rai nga ai. Nawku Hpung hpe Diocletian hkawhkam zingri shamyit ai A.D (304) ning hta dai San Pra ai masha yan hpe rim la nhtawm hkyung htawng sharawng kau ma ai. Htawng kata kaw shan a San seng san pra ai myit jasat a majaw, masha law law makam masham de du wa nna, htawng up wa hte shi a madu jan, bai kasha num sha ma ni mung makam masham hpe hkap la let Kashin Kamun hkawm la lai wa ma ai.

Htawng up yan nu wa ni, Hkristan byin tai wa ai lam hpe n hkru ai chye mat nna, shan nu wa ni yawng sat shamyit kau hkrum ma ai. San Pra ai Marcellinus hte Petru yan hpe mung, Sivlva Nigra mying ai Nam Maling kata de dun sa wa nna du htau sat kau ma ai. Shan hpe baw htau sat kau ai wa mung, hpang daw de hkristan hpung masha byin tai mat wa sai rai nga ai.

San Pra ai Marcellinus hte Petru yan a moi mang hpe makam masham kaba ai Lucilla hte Firminia mying ai amyu shayi lahkawng gaw, Labicana Way ngu ai shara na San Pra ai Tiburtius a lupwa kaw atsawm sha makoi mayang da ma ai. Shan a lupwa ntsa kaw Constantine hkawhkam gaw, shi a chyinghkai Kanu San Pra ai Helen hpe lup makoi mayang tawn ai Nawku Jawng hpe gaw gap da wu ai.

Shan lahkawng n nga mat ai hpang, Nawku Hpung gaw, shan lahkawng hpe San Pra ai Masha dang dat ya let, Shan Lahkawng a Poi Nhtoi hpe mung, June shata praw (2) ya shani masat shagrau galaw ya sai rai nga ai.

By;

Sister Rose Angeline Maran Nang Doi (SFX)

RVA-Kachin Service (Myitkyina)