San Pra ai Mahte a Poi Nhtoi (September 21)

Kasa hte Kabu Gara Shiga shachyawm shabra ai wa, Apostle and Evangelist langai rai nga ai, San Pra ai Mahte gaw Galile mung na shalang Alpheus a kasha rai nga ai. Shi gaw, Roma asuya a matu hkansi hta ya ai wa rai nga ai; dia majaw shi hpe masha ni gaw mara lu ai wa, tinang amyu hpe sadi n dung ai wa nga nna masat kau ma ai.

Lani mi hta Capena-um mare na hkansi hta ai shara kaw shi dung nga yang, Madu Yesu shi hpe shaga la ai. Mahte gaw, shaloi jang yawng hpe tawn kau da nhtawm, Madu Yesu a hpang hkan nang mat wa ai. Lani mi hta Madu Yesu gaw, Mahte a nta kaw du nga ai. Dai hpe mu ai Hparishe nkau mi gaw, Yesu, hkan san hta ai ni, mara lu ai ni hte rau lusha ai, nga nna mara  shagun ma ai. Dai hpe na ai shaloi Madu Yesu gaw: “Hkamja ai ni tsi sara n ra ma ai; mchyi makaw hkrum ai ni she tsi sara ra ma ai. Dingman ai ni hpe shaga na matu ngai du sa ai n re; mara lu ai ni hpe shaga la na matu she ngai du sa n ngai.” nga nna bai htan ya ai. (Mahte 9:13)

Mahte gaw, jahpan ka lajang ai amu hte sak hkurng wa ai wa re majaw, shi ka ai Kabu Gara Shiga gaw hkum hkum tsup tsup hte ra n rawng ai hpe mu lu nga ai. Shi ka da ai Kabu Gara Shiga hpe masha sumla hte masat da ai; dai gaw, shi a laika gaw Madu Yesu a shying gyim aru arat jahpan hte ka hpang da ai majaw rai nga ai. Marku hpe gaw, hkanghkyi sumla, Luka hpe gaw dumsu, Yawhan hpe langji u sumla hte masat da ya ai.

Masat langai ngu na Kabu Gara Shiga hpe Mahte ka shalat da ai; shi gaw shi a buga masha ni a matu yaw shada nna, Kabu Gara shiga hte Kasa Laika kaw “Hebrew shinglet” nga nna shamying ai, shi a buga ga rai nga ai Aramac ga hte ka da ai. A.D 42 ning hta Herod Agrippa gaw, Hkristian ni hpe zingri shamyit wa ai majaw, Mahte gaw, kaga mung hkan Tara sa hkaw mat ai rai nga ai.

Hkai hkrat wa ai labau hta Mahte gaw Yuda mung kaw tara mungga hkaw shabra ai hpang Sinpraw dan de matut hkaw sa wa ai. Dai yang e shi hkaw ai makam masham a majaw sat kau hkrum lai wa sai.

Daini Nawku hpung kawn, Kasa Mahte a Poi Nhtoi hpe galaw nga ga ai aten, anhte hpung masha ni mung, tinang lu da sai makam masham hte kabu gara shiga ni hpe tinang a manaw manang ni hpe gam garan lu na atsam hpe jaw ya rit ga matu, akyu hpyi la nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)