San Pra ai Magdelena a labau lam. ( 25 June, 2019 )

San pra ai Magdalena

        San Pra ai Magdelena a lam hte seng nna, sawk sagawn hka ja lu ai made mi gam garan ya mayu n ngai.

          Nu wa hpu nau ni, Magdalena ngu tsun dat ai hte anhte malawng maga chye na da ai gaw, nse nsa galaw ai shayi sha rai nga ai, nga nna chye na da ma ai. Kaja wa mung, Magdalena gaw, grai tsawm htap ai shayi sha re majaw, shi a hkum hpe dut sha nna nse nsa galaw let gumhpraw tam lai wa sai jan rai nga ai. Grai tsawm htap ai shayi num sha re majaw, masha ni shi hpe grai shakawn, ra sharawng nga ma ai. Shingrai, Magdalena gaw, grai gumrawng gumtawng wa ai hte nse nsa ai numsha tai mat nu ai. Ya na zawn shi a mahkawn prat hpe manu nshadan, hpaga langai hku shatai let, sak hkrung hkawm sa nga nu ai. Manaw manang ni gade jahpoi asawng ai raitim, gadai hpe hpa zawn nnawn, shi hkum shi tsawm ai ngu ai myit hpe sha hkam la nhtawm me, dai hku sha nga nga sai. Magdalena gaw, shawa num re majaw, gadai mung hpa zawn nnawn, hkrum mara nga ai zawn rai nga ai. Ndai zawn re ai magam bungli gaw, Nawku hpung hte nhtan shai ai re majaw, shut hpyit mara hta lam dam nga ra mat sai. Daiten hta, Magdalena a matu, shut hpyit mara ngu ai hpe dum ai raitim, ja gumhpraw a majaw, lawt lu nmai byin taw nga sai. Lani mi na ten, Magdalena gaw, Madu Yesu Hkristu hkaw tsun dan ai Mungga hpe na la nu ai. Dai hpang Magdalena myit malai kaba hte Madu Yesu hpang de hkan nang wa sai rai nga ai.

          Nu wa hpu nau ni, masha gaw, shut chye ai ni hkrai rai nga ai, dai shut hpyi mara hpe myit dum myit malai let, kaja ai de hkawm sa na sha ahkyak rai nga ai. Magdalena a prat hpe yu yu ai shaloi, ya na zawn nse nsa galaw sha ai majaw, mare buga masha ni, shi hpe rim la nhtawm me, nlung hte gabai sat na matu, tsun jahtau nga ma ai. Dai ten, Madu Yesu gaw, nanhte kaw na shut hpyi mara nkap ai wa shawng nlung hte gabai sat mu ngu, tsun dat ai shaloi, gadai mung n gabai gwi, asim sha baw gum nna, langai hpang langai, dai gawk kawn pru mat ma ai lam Ja Chyum Mungga hta na chye lu ga ai re. Hpang Jahtum Madu Yesu hte Magdalena sha ngam taw nga sai. Dai shaloi Madu Yesu, Magdalena hpe ya hpang de mara n galaw na matu, sharin shaga, n gun jaw dat sai majaw, hpang jahtum Magdalena myit malai kaba hte Madu Yesu hpe chyeju dum nma rai nga ai. Shingrai, lani mi hta, Madu Yesu gaw, Salang langai a nta kaw shat sha nga yang, Magdalena lung hpraw gawm hta grai hpu ging ai sau lang nhtawm me, Yesu hpang de sa nna, Madu a baw hta chya ya ai hte hkrap nga let, Yesu a lagaw ni hpe shi a myi prwi hte kashin kau ya nna, shi a kara hte katsut ya nga nu ai.

          Shingrai, Magdalena gaw, shi myit yawn myit malai ai hpe Madu kaw madun dan sai rai nga ai. Shaloi Yesu gaw, na a law la ai mara ni hpe Ngai raw dat hkyem sa jaw ya ni ai, ngwi pyaw ai hte wa nu, ngu nna tsun dat nu ai. Dai hpang shi a kayung wa Lazaru a nta de wa nga nna, Magdalena gaw grai chyoi pra ai num sha tai mat sai rai nga ai. Nu wa ni, kaja wa myit malai kaba hte myit malai ai wa gaw, Karai Kasang a shaman chyeju nnan hpe hkam la lu na teng sha rai nga ai. Madu Yesu a prat na labau hta, Lazaru, Martha hte Magdalena shan nau ni hpe Yesu Madu grai tsawra ai majaw, shanhte a nta de Yesu sa nga nga re ai lam Ja Chyum Mungga ni hkan mu hti lu na ga ai. Bai, Lazaru si mat ai shaloi mung, San Magdelena nhprawng shakram ai sha, nhkrit ai sha Madu a wudang nhpang e hput di let hkrap nna akyu hpyi nga ai. Bai nna, Yesu bai hkrung rawt ai shani e mung, Magdelena gaw, manam pyaw ai sau ni hpe la sa nhtawm me, Madu a lup de sa wa ai lam chye lu ai. Shaloi Yesu gaw, shi hpe shawng dan pru dan nhtawm me, Madu bai hkrung rawt ai lam Sape ni hpe wa tsun dan shangun ai lam (Marku 16: 9) kaw hpaw tsun da nga mali ai re.

          Bai, Yesu Madu Lamu de lung wa ai hpang Yerusalem de Nawku hpung hpe zingri zingrat ai shaloi mung, Magdelena gaw, Francis mung de sa nga ai ten rai nga ai. Dai ten kawn nna, shi si ai ten du hkra lungpu langai mi hta shi akyu hpyi tara shadik nga lai wa sai lam Nawku hpung a labau hta hpaw tsun da nga mali ai nu wa ni. San Magdalena gaw dai lungpu kaw shaning (30) ning tup nga nna, tara shadik lai wa sai jan rai nga ai. Shingrai, lahta de na la lu sai Magdalena a prat labau hpe bai nhtang yu ai shaloi, gawng shingyan tsawm ai hte yawng e ra sharawng ai re majaw, shi a hkum hpe dut sha nna, ja gumhpraw tam ai, nawku hpung a tara hte nhtan shai ai magam hpe galaw ai, mara hta lam dam nga ai jan re hpe mu lu ai. Raitim, Madu Yesu Hkristu a Mungga hpe na la lu sai hte rau, jet ai myit malai kaba hte Madu hpe sak se hkam lai wa sai jan rai nga ai. Shi a shut hpyit mara ni hpe raw dat hkyem sa jaw ya na matu, Yesu Madu a man hta ding yawm dagup let,  shagrit shanem ai hte ngam nga ai shi a sak prat hpe manu shadan jai lang wa sai lam labau hta matsing da ai hpe na chye lu nga ga ai. Madu Karai Kasang gaw, shut hpyit mara hpe matsat ai, raitim, shut hpyit mara kap ai wa hpe grai tsawra ai rai nga ai. Hpa majaw nga jang, shut hpyit mara kap ai ni myit malai lu na hpe grai ra sharawng ai majaw re. Anhte shinggyim masha yawng gaw, mungkan ga kaw sak hkrung nga ai jahkring sha rai na re. Prat tup grin ai sumsing mungdan de ning ngai nga lu na matu shakut nga ai ni hkrai rai nga ga ai. Dai majaw, San Pra ai Magdelena a kasi hpe la let, shut hpyit mara ni hpe Madu kaw hkyem sa tawng ban hpyi nem nga ga. Daizawn myit yawn myit malai ai wa gadai hpe rai tim, Madu Karai wa, hkap tau la na teng sha rai nga ai. San Pra ai Magdalena a poi hpe Nawku hpung kawn nna, July shata (22) ya shani ngu, masat da ya sai rai nga ai. Shingrai, dai nhtoi du shagu, lak lai ai shaman chyeju ni hpyi la nga ga ngu, n gun jaw let, lamang hpe ndai kaw naw jahkring sai rai.

Ka lajang ai;    Mama Rose Angeline Maran Nang Doi

                          RVC, Ginjaw Rung, Aung Nan

                          Myitkyina.