San Pra ai Ludger a Poi Nhtoi (March 26) 26 March 2023

San Pra ai Ludger a Poi Nhtoi (March 26)

San Pra ai Ludger gaw, Netherland mungdan, Zuilen mare kaw shangai chyinghkai wa ai rai nga ai. Shi gaw, England mungdan, na San Pra ai Gregory hte England Mungdan, York Mare dingsa kaw na, Alcuin a lata hta e laika hpaji sharin hkaja la lai wa ai. Shi gaw, Germany Mungdan, Cologne mare kaw, lai wa sai A.D (777) ning hta Jau tai Sacramentu hpe hkam la nna, A.d (804) Ning hta Munster mare kaw na, Shawng ningnan Saradaw lit shatsam ya ai hpe hkrum nu ai.

San Pra ai Saradaw Ludger gaw, Netherland mungdan, Friesland ginwang hta sanit ning sasana magam gun hpai lai wa ai. Dai ginwang, hpe Saxon amyu ni gasat la kau nna Jau ni yawng dai ginwang kaw na jahtaw kau ai hkrum ai hta shi mung lawm nga ai. Dai majaw, shi gaw Italy Mungdan, Monte Cassino mare kaw lahkawng ning hpung a magam bungli gun hpai lai wa ai. Dai lahkawng ning laman Charlemagne Hkawhkam kawn tawt shapraw kau ai Friesland ginwang kaw na mare mangai kaw nga shajang ai Hpung Masha ni a wenyi lam hte seng nna yu gawn ya na matu, Saradaw Ludger hpe lit shatsam nhtawm bai wa shangun ai.

Saradaw Ludger a shakut sharang ai myit, atsam marai dat ai myit jasat hte kasing kamang tai ai sat lawat ni a majaw, shi a sasana magam grai awng dang lai wa nu ai. Shi gaw, Germany mungdan, Werden hte Munster mare kaw Jau Jawng ni hpe hpaw hpang da ya sai. Munster mare a matu, shawng nnan ngu na Saradaw tai wa sai.

San Pra ai Saradaw Ludger gaw, amu bungli kyin, nrau ai ni a kasi tai ya nga ai. shi chyu sha n-ga, shi yu gawn lajang ai ni hpe mung, kade kyin timung akyu hpyi ten hpe gaw tup hkrak hkan shatup shangun ai. Shi amu n rau, yak hkak mang hkang lam ni kade mi hkrum timung, shi chyu akyu hpyi ten, shing n rai, shawa akyu hpyi ten hpe galoi mung n shayawm ai sha hkan shatup wu ai.

San Pra ai Saradaw Ludger gaw, A.D (809) ning, March shata (26) ya, Kungla Shaman Poi Shani (Palm Sunday) shawa hpawng Misa Hkungga (2) lang nawng jau ya ai hpang shana daw de, Madu kaw yup pyaw ban sa mat wa sai rai nga ai. 

Saradaw Ludger n nga mat ai hpang, Nawku Hpung gaw, Shi hpe San Pra ai Masha dang dat let, Shi a Poi Nhtoi hpe mung, March shata (26) ya shani ngu masat shagrau dat ya sai rai nga ai.

Daini Nawku hpung gaw, San Pra ai Saradaw Ludger a Poi Nhtoi hpe galaw nga ga ai aten hta, anhte a sak prat hkrun lam hta mung, kade mi n rau ai raitim, Karai Kasang Wa hpang de akyu hpyi na aten lu jaw hkra shakut sa wa ga ngu, n gun jaw gam garan ya dat n ngai law.

By;

Sister Rose Angeline Maran Nang Doi (SFX)

RVA-Kachin Service (Myitkyina)

Video Link: https://www.youtube.com/watch?v=RZCHzQTBqZY