San Pra ai Lucy a Poi Nhtoi (December 13) 13 December 2023

San Pra ai Lucy a Poi Nhtoi (December 13)

San Pra ai Lucy gaw, makam masham a majaw, si hkam ai San Pra ai ni kaw na mying kaba dik langai mi rai nga ai. San Pra ai Lucy hpe myi kyaw ai ni hpe alak mi rai garum yaw ai San Pra ai Masha nga nna mung  masat shagrau kam shamyet nga ai re. Shi gaw, Tsa ban (3) hta Italy Mungdan, Syracuse mare na Lusu nga pyaw ai kun dinghku kaw na shangai wa ai rai nga ai.

San Pra ai Lucy gaw, ma kaji ten kaw nna kawa n nga mat ai majaw, shi a kanu gaida sha woi bau kaba wa ai. Kanu a mying gaw, Yutihkyiya (Shing n rai) Euthchia ngu ai rai nga ai. Lucy gaw, ma kaji ai aten kaw nna, kanu a sharin matsun ya ai a marang e, makam masham hte hkrak nga kaba wa ai; Karai Kasang hte aten tup arau nga ai myit jasat lu dawk bang ya nu ai.

Shi gaw, akyu hpyi shaja ai hte kaja ai amu magam bungli hpe lata nna galaw chye ai. Shi a hkum hpe Madu Yesu kaw ma kaji aten kawn ap jaw kau ai lam kadai hpe mung n tsun dan ai.

Lani mi hta Lucy gaw, kanu hte arau San Pra ai Agatha a Lupwa kaw akyu sa hpyi ma ai; dai shaloi shi a myit jahkut daw dan tawn ai lam kanu hpe tsun dan ai. Dai aten du hkra Kanu gaw, shaning law law hkam sha lai wa sai machyi kaba kaw nna, dai San Pra ai Agatha a Lupwa kaw akyu sa hpyi ai hkrun lam kaw asan sha mai mat nu ai.

Kanu gaw, dai mabyin a majaw, Karai Kasang hpe chyeju dum ai masat ding sat hte kasha Lucy hpe mung shi daw dan jahkut da ai hte maren, prat tup hkawnsek prat hta sak hkrung nga mat na matu kabu gara ahkang jaw ya nu ai.

A.D (304) ning du shaloi, Lucy gaw, shi hpe dinghku de na matu sa hpyi ai lusu arawng lu ai shabrang kasha hpe mung n dang kau ai majaw, shabrang kasha gaw, Lucy hpe Hkristan masha re nga nna mara shagun ai. Hkawhkam Diocletian gaw, Lucy hpe rim la nna htawng kaw zingri shatsang ai.

Diocletian gaw, Lucy hpe shwa num ni hte arau tawn da ai; raitimung, Karai Kasang gaw, Lucy hpe mara tsep kawp n galaw hkrup na matu, ja ja rai makawp maga da ya sai. Lucy hpe wan nat sat kau na masing mung n awng dang mat ai. Dai majaw, Hpyen la ni gaw, Lucy a myi tum ni malawk ya kau ma ai. Raitimung, Lucy a myi ni gaw, shawoi na hta grau tsawm jat wa ai. Hpang jahtum e dai n hkru ai masha ni gaw, Lucy a du kaw nhkyi galun bang nna sat kau ma ai. 

Shi n-nga mat ai hpang, Nawku hpung kawn shi hpe San Pra ai Masha hku nna dang da let, Shi a Poi Nhtoi hpe December (13) ya shani, shaning shagu myit dum galaw ya nga ai rai nga ai.

Daini Nawku Hpung gaw, San Pra ai Lucy a Poi Nhtoi hpe galaw nga ga ai aten hta, anhte hpung masha ni mung, shani shagu na anhte a sak hkrung hkawmsa ai hkrun lam hta, San Pra ai Lucy a kasi ningli ni hpe la nna, tinang a lu da sai makam masham hpe kaning re ai aten hta mi raitim, gwi gwi sak se hkam lu ai ni byin tai lu hkra shakut sa wa ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)

#RVA_Kachin_Service

#Feastday_December13

#St_ Lucy