San Pra ai Louise de Marillac a Poi Nhtoi (March 15)

San Pra ai Louis de Marillac gaw, 1591 ning, August shata (12) ya shani, Fransik Mungdan kaw shangai chyinghkai wa ai rai nga ai. Shi a asak (22) ning du ai shaloi Antoine ngu ai wa hte kun dinghku de ai. Dinghku prat (13) ning na ai hpang, shi a n rum ntau wa n nga mat ai. Shan gaw, kasha langai mi lu ai rai nga ai.

Shi gaw, madu wa n nga mat ai hpang, Mama tai wa nhtawm akyu hpyi shaja nna masha ni hpe daw jau ai magam hte sak hkrung nga lai wa sai. Grau nna machyi makaw hkrum ni ai hte matsan mayan ni hpe garum jaw let nga lai wa sai.

Shi a hpaji jaw garum jaw ai hte “Matsan Dum Chye ai Shayi Sha Ni” (Daughters of Charity) mying ai Mama Wuhpung hte “Machyi Makaw hkrum ai Matsan Masha ni hpe Galaw Daw Jau ai Wuhpung” (Servants of the Sick Poor) ngu ai Mama Magam Gun Wuhpung ni hpe gaw de hpang da lai wa sai. Shi a kasi kalang hpe yu nna amyu shayi sha ni law law gaw, ndai matsan dum lama ai magam hpe madung tawn ai Wuhpung de shang wa ma ai. Ndai Wuhpung Magam Gun Wuhpung ni gaw, hkum hkrang hte seng ai, wenyi hte seng ai lam ni hta garum jaw let yu lakawn ai magam hpe shakut galaw nga ma ai.

Ndai zawn rai nna, yawng a matu akyu rawng ai magam hpe gun hpai nga ai, San Pra ai Louise de Marillac gaw, 1660 ning, March shata (15) ya shani, Madu kaw yup pyaw ban sa mat wa sai rai nga ai.

Shi n nga mat ai hpang, 1920 ning, May shata (9) ya shani, dai aten na Wa Sarabyin Benedict (XV) kawn shi hpe A lu ai masha hku nna masat shagrau dat sai rai nga ai.

Dai hpang, 1934 ning, March shata (11) ya shani, dai aten na Wa Sarabyin Pius (XI) kawn, shi hpe San Pra ai masha dang dat let, Shi a Poi Nhtoi hpe mung, March shata (15) ya shani masat dat ya sai rai nga ai.

Daini Nawku Hpung gaw, San Pra ai Louise de Marillac a Poi Nhtoi hpe galaw nga ga ai hte maren, anhte a prat hta mung, tinang hkawmsa nga ai aprat hte tinang a makau grup yin hkan matsan mayan jam jau hkrum nga ai ni hpe dang dep ai maga hku nna galaw daw jau lu hkra shakut nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)