San Pra ai Leonard Murialdo a Poi Nhtoi (May 19) 19 May 2023

San Pra ai Leonard Murialdo a Poi Nhtoi (May 19)

San Pra ai Leonard Murialdo gaw, Italy Mungdan, Turin Mare kaw, lai wa sai 1828 ning, October shata (26) ya shani shangai chyinghkai wa ai rai nga ai. Shi gaw, Lusu nga pyaw ai Kanu yan Kawa kaw na shangai wa ai raitim, shi ra sharawng gaw, matsan mayan ni, dip lu dip sha hkrum ai ni, kabai da hkrum ai ramma ni hpe yu gawn ai amu gun hpai na hpe shi ra sharawng dik rai nga ai.

San Pra ai Leonard Murialdo gaw, San Pra ai John Bosco a manang hte bungli rum langai mi rai nga ai. Shi hpe matsan mayan rai kabai da hkrum ai ni lak san kam hpa mai ai San Pra ai Masha ngu masat da nga ai. “Matsan ai, kabai da hkrum ai ma ni hte matsan ai ni hpe yu gawn nna hpaji sharin ya ai magam bungli gaw, grai manu dan la nga ai. Dai hta grau ai gaw matsan ai ni, kabai da hkrum ai ni hpe hkan tam sagawn la ai, hpaji sharin matsun ya ai, aten jaw ya ai, htawm hpang prat a matu bau kaba ya ai bungli ni gaw, manu dan dik ai bungli rai nga ai. Hkum hkrang hte seng ai lam hta kabai da hkrum timung, wenyi lam hta kabai da hkrum ai gaw grai yawn hpa rai nga ai.”

“Chyahkrai ma ni hte roi rip hkrum dip lu dip sha hkrum ai ni hpe makawp maga la na matu, shanhte hpyi shawn ai ga hpe madat ya ni ai.” (Shkn 9:18)

San Pra ai Leonard Murialdo gaw, San Pra ai John Bosco zawn, matsan mayan ni hte masha shagu hpe shawang tsawra myit hte Hkristan nga sa lam ni hta woi kaba na myit rawng nga ai. Shi gaw, “Kahtawlik Shamu Shamawt Wuhpung” (Shing n rai) Catholic Action hpe gaw de hpang da ya sai. Nazaret kahtawng kaw na grit nem la ai Laksama wa San Pra ai Joseph zawn matsan mayan ni hte ramma ni hpe matsan dum lama myit shawng tawn let kasa amu hte galaw daw na matu “Joseph of Murialdo” mying ai Murialdo a Joseph Wuhpung hpe gaw de hpang da nhtawm San Pra ai Joseph hpe ap dawn da wu ai.

San Pra ai Leonard Murialdo gaw, 1900 ning, March shata (30) ya shani, Madu hta yup pyaw ban sa mat wa sai rai nga ai.

Shi n nga mat ai hpang, 1963 ning, November shata praw (3) ya shani, dai aten na, Wa Sarabyin Pawlu (VI) kawn, shi hpe A lu ai masha masat shagrau dat ya sai rai nga ai.

Dai hpang, 1970 ning, May shata praw (3) ya shani hta gaw, Wa Sarabyin Pawlu (VI) sha, shi hpe San Pra ai Masha dang dat let, shi a Poi Nhtoi hpe mung, May shata (19) ya shani masat shagrau dat ya sai rai nga ai.

Daini Nawku Hpung gaw, San Pra ai Leonard Murialdo a Poi Nhtoi hpe galaw nga ga ai aten hta, Anhte hpung masha ni mung, San Pra ai Leonard Murialdo zawn, tinang a makau grup yin hkan nga ai, matsan mayan, jahkrai nmai ni, hpaji lam yan hta hpang hkrat nga ai ma ni hpe dang lu ai made garum pawn ba la lu hkra shakut sa wa nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)