San Pra ai Lawrence a Poi Nhtoi (August 10) 10 August 2022

San Pra ai Lawrence a Poi Nhtoi (August 10)

San Pra ai Lawrence gaw, “Matsan Masha ni Laksan Kam Shamyet ai San Pra ai Masha” (Patron of the Poor) rai nga ai. Shi gaw, Roma mare na Deacon hte Nawku Hpung a Gumhpraw Jum ai kunhting wa rai nga ai.

A.D (257) ning hta Wa Sarabyin Sixtus (2) hte Deacon marai (4) gaw, San Pra ai Callixtus a lupwa kaw makam masham a majaw, sat shamyit kau hkrum ai hpang, Deacon Lawrence gaw, Misa Hkungga hta lang ai Gawm hte Nawku Hpung a arung arai ni hpe dut kau nhtawm, matsan masha ni hpe garum jaw ai amu galaw ai kaw jai lang kau wu ai. Dai zawn galaw kau ai lam, Roma mare uphkang du ni chye kau nna, Lawrence hpe Hpung na arung arai ni yawng Emperor Hkawhkam kaba kaw ap kau na matsun ai hpe hkrum wu ai.

Masum ya na ai shaloi, Deacon Lawrence gaw, Nawku Hpung kawn garum jaw da ai masha ni yawng hpe uphkang du hpang de woi sa wa nna, “Ndai ni gaw, Nawku Hpung a Ja Sutgan ni re.” nga nna tsun ai. Ga dai na ai shaloi, uphkang du grai pawt nna, shi hpe laja lana dik ai ari hte sat kau na matu daw dan nu ai. Ya na zawn, dai uphkang du wa gaw, A.D (258) ning, August shata (10) ya shani hta grai tu chyi ai wan n-ga ni kata kaw bang tawn ai hpri wanmang ntsa e Deacon Lawrence hpe sin-gu krin rai, taleng da nna gakang ma ai.

Aten grai na hkra ndai zawn gakang tawn ai hpang, Deacon Lawrence gaw, mani sumsai myi man hte uphkang du wa hpe; “Nye a hkum maga mi gaw hkut sai, maga mi de naw gale gakang u.” nga nna tsun ai. Nsa grai nhtum yang, Deacon Lawrence gaw, Roma mare myit malai lu wa na matu, akyu hpyi kau da wu ai.

Share shagan Deacon Lawrence a makam masham majaw, jam jau dik ai hku si hkam ai hpe mu nna, ginwang up du hte hpyen la ni law law myit malai lu wa let, Hkristan Makam Masham de gale shang wa ma ai.

Deacon Lawrence hpe makoi mayang tawn ai lupwa ntsa kaw, Constantine Hkawhkam gaw, grai hkik hkam ai Nawku Jawng langai hpe gaw gap da ya sai rai nga ai.

Deacon Lawrence n nga mat ai hpang, Nawku Hpung gaw, Shi hpe, San Pra ai Masha hku nna dang dat let, Shi a Poi Nhtoi hpe mung, August shata (10) shani masat shagrau dat ya sai rai nga ai.

Daini Nawku Hpung gaw, San Pra ai Deacon Lawrence a Poi Nhtoi galaw  nga ga ai aten hta, anhte Hpung Masha ni mung, Deacon Lawrence a kam sham myit kaba ai kasi hpe yu la nna, anhte a Christan Makam Masham grau nna, galu kaba maden zinghka wa hkra, Makam Masham rai n lu shi ai ni hpang de Makam Masham Nli gat hkai ya lu ai ni tai nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)