San Pra ai Lawrence Justinian a Poi Nhtoi (September 5) 05 September 2022

San Pra ai Lawrence Justinian a Poi Nhtoi (September 5)

San Pra ai Lawrence gaw, Italy Mungdan, Venice Mare kaw, lai wa sai 1381 ning, July shara Praw (1) ya shani, shangai chyinghkai wa ai rai nga ai. Shi a kanu yan kawa gaw, Giustiniani mying ai hting gaw na masha kaba ni rai ma ai. Kawa n nga mat ai hpang, Kanu gaw, shi hpe hpaji kaja sharin shangun nna, dinghku de shangun mayu ai. Raitimung, Lawrence gaw, dinghku n de ai sha, Hpung Magam gun tai mayu ai majaw, Venice mare makau na zinglawng kaw nga ai Canons Regular of St. George Sasana Magam Gun Wuhpung de shang mat wa nu ai.

Lawrence gaw, n dan n dawng ai sha nga nna, matsan masha ni a matu, mare de pru sa nhtawm, garum hpyi hkawm ai. Shi hpe shagrit shanem ai wa, chyoi pra ai wa, matsan chye dum ai wa, nga nna shamying ya ma ai. Lawrence Jau tai wa ai hpang, Shi gaw, tara hkaw ai lam hte makam masham sharin shapan ya ai hta, grai ning tawn ai Jau langai mi tai wa sai rai nga ai.

1433 ning hta, Jau Lawrence hpe Castala Mare na, Saradaw aya dang ya ma ai. 1451 ning hta, Sarabyin Nicholas gaw, Shi hpe Venice mare na, Saradaw kaba, Archbishop aya dang dat ya sai rai nga ai. Shi a makam masham kaba ai hte matsan masha ni a ntsa shawang tsawra myit kaba ai lam a majaw, Venice ginwang ting na Saradaw kaba (Patriarch of Venice) lit matut shatsam ya hkrum nu ai. San Pra ai Saradaw kaba Lawrence gaw, myithtoi atsam hte lamik kumla galaw ya lu ai shaman chyeju lu ai wa mung rai nga ai. Shi a sharin shaga ai lam ni hpe Nawku Hpung gaw, manu shadan ya nga ai.

San Pra ai Saradaw Lawrence gaw, 1455 ning, January shata (8) ya shani, shi a asak (74) ning du ai shaloi, Madu hta yup pyaw ban sa mat wa sai rai nga ai.

Saradaw Lawrence n nga mat ai hpang, 1524 ning hta, dai aten na, Wa Sarabyin Clement (7) kawn, Shi hpe A Lu ai Masha ngu masat shagrau dat sai rai nga ai.

Dai hpang, 1690 ning, October shata (16) ya shani, dai aten na, Wa Sarabyin Alexander (8) kawn, Shi hpe San Pra ai Masha dang dat let, Shi a Poi Nhtoi hpe mung, September shata (5) ya shani ngu masat shagrau dat ya sai rai nga ai. 

Daini, Nawku Hpung gaw, San Pra ai Saradaw Kaba Lawrence Justinian a Poi Nhtoi hpe galaw nga ga ai aten, anhte Hpung Masha ni mung, matsan jam jau hkrum nga ai ni hpe matsan dum ai hte dang lu ai daram lakawn la lu hkra shakut sa wa nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)