San Pra ai Laura Vicuna a Poi Nhtoi (January 22)

San Pra ai Laura Vicuna gaw, san seng san pra lam hte wenyi n gun atsam lam ni hta n gun la gying ai san pra ai masha langai mi rai nga ai. Shi gaw, 1891 ning, April shata (5) ya shani, Chile Mungdan, Santiago mare kaw shangai chyinghkai wa ai rai nga ai.

Shi a Kawa gaw, hpyen la rai nhtawm, shi a asak lahkawng ning sha naw rai yang n nga mat wa sai. Dai majaw, shi a Kanu Mercedes gaw hpyen dap kaw n mai nga sai re majaw, Lau ra hte rau shi a kana rai nna, shannu ni marai (3) gaw, kaga mare de htawt nga ra mat ai. Dai mare kaw shi a Kanu gaw, kan bau magam a majaw, amu galaw sha na shara dam lada lu ai dinghku la langai Manuel Mora a num kaji sa tai nga ra mat ai.

Shi a asak (8) ning du ai shaloi, Salesian Mama Jawng kaw laika hpaji sharin let sa nga mat ai. Mama ni a kasi kaja hpe mu ai shaloi, sumsing mungdan a lam hta shi grau sharawng ai myit rawng wa nu ai. Shi hkum nan mung, Mama tai mayu ai myit ni rawng wa sanu ai.

Shi a asak (10) ning du ai shaloi, ginhtawng jawng dat aten Kanu hpe bai wa jahkrum wu ai. Shi Mama tai mayu ai lam Kanu hpe wa tsun dan ai shaloi, shi a hpang Kawa ngu na Manuel Mora gaw, tsep kawp myit n hkrum wu ai. Hpa majaw nga yang, Laura yen nau hpe jawng htawk manu ni shi jaw ya ai majaw rai nga ai.

1904 ning, January shata hta gaw, lak lai mabyin hkrum sha nu ai. Shi nta kaw wa nga ai aten lani mi hta, shi a hpang Kawa rai nga ai, sun madu Manuel Mora dingla gaw, Laura hpe n se n sa myit rawng nna gung lau na daw dan sai; shannu ni a nta kaw nna shi a sun wang kata de sa htawt nga na matu sa shadut wu ai. Laura gaw, dai dingla wa a n shawp ai myit hpe mu chye ai majaw, dai shara kaw nna hprawng mat mayu nga nu ai. Raitimung, Laura gaw machyi makaw hkrum nna n lu hprawng yen mat nu ai. Ndai zawn rai nna, Kanu a wenyi hpe hkye la lu na matu shi a hkum hpe Karai Kasang kaw ap nawng da wu ai. Dai mazut dik ai Manuel Mora gaw, dai hpe ahkaw ahkang la nna n se n sa galaw na matu gyam yu ai lam n awng dang ai majaw, shi a shangun ma ni hpe Laura hpe malap mat hkra jawm adup shangun nu ai.

San Pra ai Laura gaw, adup zingri hkrum nna yupra n tsa kaw galeng nga let, Kanu hpe, “Tsawra dik ai Nu e, nu a wenyi hkye la hkrum na matu, nye a hkum Karai Kasang kaw ap kau ya ni ai, ngai rai n si shi yang Nu a myit malai ai lam hpe mu kau da mayu ai.” ngu nna tsun wu ai. Kasha a ga dai hpe na ai shaloi, Kanu Mercedes gaw myi prwi si hte rai nna, “Nu a tsawra dik ai ma e, Nu a mara ni hpe hkyamsa jaw ya rit yaw; ma tsun ai lam shagu Nu hkan galaw na yaw, daini kaw nna Nu a prat hpe galai shai let nga mat na ga sadi mung, Ma hpe jaw dat n ngai yaw.” ngu nna ga sadi jaw dat wu ai. Shaloi Laura gaw, mani sum sai hte “Chyeju kaba sai Madu e, Chyeju kaba sai, Nu Maria e, Bai hkrum ga yaw…Nu, ya ngai si pyaw ni ai” ngu bai htan ya wu ai.

Ndai zawn shannu a lapran na yawn hkyen mabyin byin ai hpang bat mi na ai shaloi, January shata (22) ya shani, shi a  asak (13) ning sha naw rai yang, n sa hti mat wa sai rai nga ai.

San Pra ai Lura Vicuna n nga mat ai hpang, 1988 ning, September shata praw (3) shani hta, dai aten na San Pra ai Wa Sarabyin Yawhan Paulu (II) gaw shi hpe San Pra ai masha dang dat let, shi a Poi Nhtoi hpe mung, January shata (22) ya shani ngu masat shagrau dat ya sai rai nga ai.

Daini Nawku Hpung gaw, San Pra ai Laura Hkawnsek ma a Poi Nhtoi hpe galaw nga ga ai aten, anhte marai hkum shagu mung, tinang a marang e, tinang a dum nta masha ni, manaw manang, makin jinghku ni a wenyi hpe hkyen mawai makawp maga la lu ai ni byin tai lu hkra, galoi mung shakut nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)